د منځني ختیځ کړکېچ؛ د غزې په شمال کې د اسراییلي ځواکونو په بریدونو کې ۵۵ کسان وژل شوي دي
د غزې د روغتیا وزارت د سې شنبې (د تلې ۲۴مه) په ورځ وویل، چې د غزې په شمال کې په تېرو ۲۴ ساعتونو کې د اسراییل په بریدونو کې لږ تر لږه ۵۵ فلسطینیان وژل شوي دي.
په غزه کې د فلسطین د ملکي دفاع ویاند محمود بسال ویلي، چې په وژل شویو کسانو کې اووه تنه د السید کورنۍ دي.
نوموړی وايي، د دوی جسدونه په خپل کور کې خاورو ته سپارل شوي دي.
بسال وویل، پنځه نور جسدونه له سړکونو څخه موندل شوي دي.
الجزیره راپور ورکوي، چې په یوې بلې جلا پېښه کې اسراییلي ځواکونو د کمپ په بیراکت ابو راشید سیمه کې برید وکړ، چې لږ تر لږه درې کسان یې ووژل او یو شمېر نور یې ټپیان کړل.
ځايي اوسیدونکو الجزیرې ته ویلي چې پوځیانو په الفلوجه کې د ودانیو او کورونو د ویجاړولو لپاره له چاودیدونکو توکو ډک بیرل په ځمکه کې ښخوي.
د تېر کال د اکټوبر له اوومې را په دې خوا، د اسراییل او غزې په جګړه کې ۴۲ زره او ۲۸۹ څخه زیات فلسطینیان وژل شوي او ۹۸ زره او ۶۸۴ تنه نور ټپیان دي.
پر اسراییل د حماس په برید کې یو زرو ۱۳۹ تنه وژل شوي او تر ۲۰۰ ډېر یرغمل شوي دي.
