یو سرتېری پر امریکایي ځواکونو برید کې داعش سره د مرستې په تور په ۱۴ کاله بند محکوم شوی

د امریکا د عدلیې وزارت وویل، چې د امریکا د پوځ یو سرتېری، کول بریجز، په منځني ختیځ کې پر امریکایي ځواکونو برید کې له داعش سره د مرستې په تور په ۱۴ کاله بند محکوم شوی دی. همدا راز دغه ۲۴ کلن سرتیری له داعش سره د مادي ملاتړ په تور هم په بند محکوم شوی دی.

چارواکو وویل، چې بریجز د ۲۰۲۳ کال د جون په ۱۴مه پر ترهګریزو تورونو اعتراف وکړ، خو حکم یې دا اونۍ صادر شو.

هغه د ۲۰۱۹ کال په سپټمبر کې د امریکا پوځ کې شامل شو.

د متحده ایالاتو د عدلیې وزارت وویل: «تر دې دمخه چې بریجز پوځ کې شامل شي، حد اقل له ۲۰۱۹ کال راهیسي، د جهادیانو او د هغوی د تاوتریخوالي ایډیالوژۍ ملاتړ یې په انلاین ټوګه پیل کړ او په ټولنیزو رسنیو کې یې د داعش او جهاد لپاره خپل ملاتړ څرګند کړ.»

د ۲۰۲۰ کال په اکټوبر کې، بریجز د ایف بي ای له یو مخفي کارکوونکي سره انلاین اړیکې ونیولې چې ځان یې په مینځني ختیځ کې د داعش وسله والو سره په تماس کې د داعش ملاتړي په توګه معرفي کړ.

چارواکو وویل، چې د دغو اړیکو په ترڅ کې، بریجز د متحده ایالاتو له پوځ څخه خپله ناهیلي څرګنده او د داعش سره د مرستې کولو هیله یې وښودله.

هغه بیا د "داعش" تورنو وسله والو ته چې په نیویارک ښار کې د احتمالي هدفونو په اړه یې پلان جوړوه، مشورې ورکولې او د هغوی روزنه او لارښوونه یې کوله.

همدا راز، بریجز داعش وسله والو ته د متحده ایالاتو د پوځ د روزنې لارښود او د نظامي جنګي تاکتیکونو لارښوونې برخې هم چمتو کړې وې، چې داعش به یې د راتلونکي برید پلان کولو کې وکاروي.

بریجز د ۲۰۲۰ په ډسمبر کې، په پرله پسې توګه د ایف بي ای کارکوونکي ته په منځني ختیځ کې پر امریکایي ځواکونو د داعش د برید په اړه لارښوونې پیل کړې.

د عدلیې وزارت په وینا، بریجز د متحده ایالاتو د ځانګړو ځواکونو د برید لپاره د داعش د کمپ د پیاوړي کولو او د امریکايي پوځیانو د وژلو لپاره پر چاودیدونکو توکو د ودانیو څخه د سیم تاوولو مشورې ورکړي.

دا قضیه چې د ایف بي ای، د متحده ایالاتو د پوځ د جاسوسی ضد کمېټې، د متحده ایالاتو د لوی څارنوالۍ دفتر، د هوایي ځواک د ځانګړو تحقیقاتو دفتر، او د پوځ د جنایي تحقیقاتو قومندانۍ له خوا وڅیړل شوه، په پایله کې تورن په لږترلږه ۱۴ کاله بند محکوم شو، چې له خوشې کیدو وروسته به تر لسو کلونو تر څار لاندې وي.