طالبان: له کوټې څخه مو د وژل شویو افغانانو د جنازو د لېږد لپاره د اسانتیاوو سپارښتنه کړې
د طالبانو د بهرنیو چارو وزارت په کوټه کې خپلې کونسګرۍ ته دنده سپارلې، چې د ډوکۍ پېښې د وژل شویو افغانانو د جنازو د لېږد په برخه کې اسانتیاوې برابرې کړي.
د بلوچستان په ډوکۍ سیمه کې تېره ورځ د ډبرو سکرو په کان د برید په پایله کې د درېیو افغانانو په ګډون ۲۰ تنه کان کېندونکي وژل شوي وو.
سیمهییزو پولیس چارواکو ویلي، چې په دغې پېښه کې د څلورو افغانانو په ګډون ۷ تنه نور کان کېندونکي ټپیان شوي دي.
د طالبانو د بهرنیو چارو وزارت د دغې پېښې په اړه اندېښنه څرګنده کړې او د پاکستان له حکومته یې غوښتي، چې د دغه ډول پېښو د مخنیوي لپاره لازم اقدامات ترسره کړي.
د طالبانو د بهرنیو چارو وزارت مرستیال ویاند حافظ ضیا احمد په اېکس پاڼه لیکلي، چې: «د بهرنیو چارو وزارت د بلوچستان په ډوکۍ سېمه کې د سکرو کانونو په کان کېندونکو د ناپېژانده وسلوالو برید غندنه کوي، چې له امله یې د ۴ افغانانو په ګډون ۲۰ تنه کاریګر ووژل شول.»
په لیکنه کې د قربانیانو کورنیو سره خواخوږي څرګنده شوې او ټپیانو ته یې د بشپړې روغتیا غوښتنه کړې.
