د سي ای اې مشر اسراییل او امریکا ته سپارښتنه وکړه، چې د ایران پوځي وړتیا جدي ونیسي

د امریکا د سي ای اې مشر اسراییل او امریکا ته سپارښتنه کړې، چې د ایران پوځي وړتیاوې له پامه و نه غورځوي.

د سي ای اې مشر ویلیم برنز ویلي، د امریکا استخبارات په دې باوري دی چې اسراییل او ایران هر اړخیزه جګړه نه غواړي؛ خو په سیمه کې د کړکېچ د زیاتېدو ګواښ رښتینی دی.

نوموړي دغه څرکندونې په یوې ناسته کې د خبرو پر مهال وکړې.

هغه وويل، منځنی ختيځ داسې يو ځای دی چې هر وخت پېچلې پېښې په کې رامنځ ته کېږي.
ویلیم برنز وویل، په داسې حال کې چې د ایران په بریدونو کې د دغه هېواد پوځي وړتیاوو کې ځیني محدودیتونه رابرسېره شوي؛ خو امریکا ته په کار ده چې د ایران پوځي وړتیاوې جدي وګڼي.
د سي ای اې مشر وویل، د غزې په خبرو اترو کې ښکېل مشران باید د اوږدمهاله ثبات لپاره د جوړجاړي، د غزې د اوربند او د یرغملو کسانو د خوشې کولو په برخه کې سختې پرېکړې غوره کړي؛ ترڅو یوې هوکړې ته ورسېږي.