انس حقاني: د اکټوبر ۷مه د افغانستان د پای په معنا نه، د شل کلن مقاومت تاریخي پیل و

د حقاني شبکې غړي انس حقاني د امریکا له خوا د طالبانو د لومړنۍ واکمنۍ د ړنګېدو په مناسبت ویلي: «د اکټوبر۷مه که ځينو پر افغانستان د امريکا د يرغل له امله د افغانستان پای باله، خو له بلې زاويې بیا د يوه شل کلن تاريخي مقاومت پيل شو.»

نوموړي په خپل اېکس کې لیکلي، چې په افغانستان کې شل کلن مقاومت امریکا او ناټو ته وښوده، چې مادي ځواک د یوه ملت «عزم» ماتولی نه شي.
د نوموړي په خبره، افغانان د خپلو نیکونو په څېر د دین او ازادۍ ارزښتونو ته ژمن دي او هرې قربانۍ ته چمتو دي.
امریکا ۲۳ کاله مخکې د ۲۰۰۱ کال د اکټوبر پر ۷مه پر افغانستان بريد وکړ او د طالبانو لومړنۍ واکمني یې ړنګه کړه.
د طالبانو له ماتولو وروسته دغې ډلې شل کاله د افغان او بهرنیو ځواکونو پر وړاندې سخته جګړه وکړه، چې له امله یې د زرګونو افغانانو په ګډون ډېر شمېر بهرنیانو ته مرګژوبله واوښته.
که څه هم یاده ډله امریکایان تورنوي، چې په افغانستان کې د ظلم او وژنو لامل شوي، خو دغه ډله د سلګونو ځانمرګو بریدونو او د افغانستان د ناامنیو اصلي عاملین بلل کېږي.
طالبان له شل کلنې جګړې وروسته د دویم ځل لپاره چې بیا واک ته ورسېدل د خپلې لومړۍ دورې په شان یې د خلکو پروړاندې زوریاتی زیات کړی او ټول بشري او نړۍوال قوانین یې تر پښو لاندې کړي.
په دې موده کې سره له دې چې د هېڅ یو هېواد له خوا په رسمیت نه دي پېژندل شوي، لا یې د پاکستان په ګډون له ځینو هېوادونو سره اړیکې ترینګلې شوې هم دي.
د یادولو ده، چې یادې ډلې په افغانستان د امریکا د برید د ۲۳ کلنې کلیزې په مناسب يوه اعلاميه کې دغه هېواد په تېرو څه باندې دوو لسيزو کې په افغانستان کې په اشغال، ظلم او وژنو تورن کړی او خوښي يې ښودلې، چې د دوی د «جهاد» له کبله يې ماتې خوړلې.