جنرال کنیټ مک کنزي: له افغانستان نه د امریکا وتلو د پوتین په څېر دکتاتوران زړور کړل
د متحده ایالاتو د مرکزي قوماندانۍ پخوانی قوماندان جنرال کنیټ مک کنزي وايي، له افغانستان نه د امریکايي ځواکونو د وتلو سپارښتنه ده نه وه کړې، بلکې دا د امریکا د مشرتابه پرېکړه وه.
هغه وايي: « له افغانستان نه د متحده ایالاتو په وتلو سره القاعدې او داعش بېرته ځانونه سمبال کړل او د پوتین په څېر دکتاتوران یې زړور کړل چې وروسته یې پر اوکراین برید وکړ.»
مک کینزي له واشنګټن ژورنال سره په یوه ژوندۍ خپرونه کې د افغانستان او منځني ختیځ د کړکېچ په تړاو خبرو کې وویل، چې ده له افغانستان نه د امریکايي ځواکونو د راوتلو پرېکړه پلې کړه او د افغان او امریکايي وګړو له مرګ ژوبلې سربیره یې خپل ځواکونه را واېستل.
مک کنزي وايي، « ځمکنیو ځواکونو خپله دنده ښه ترسره کړه او زه پرې ویاړم».
د متحده ایالاتو د مرکزي قوماندانۍ دغه پخوانی قوماندان وايي، له افغانستان نه د متحده ایالاتو په وتلو سره القاعدې او داعش خپلې وړتیاوې بېرته ورغولې او د پوتین په څېر دکتاتوران یې زړور کړل چې وروسته یې پر اوکراین برید وکړ.
مک کنزي چې د ۲۰۱۹ کال له مارچ میاشتې نه د ۲۰۲۲ کال تر اپریل پورې د امریکا د مرکزي قوماندانۍ یا سنټکام قوماندان و، تېر کال په یوه مرکه کې له افغانستان نه د امریکایي ځواکونو د وتلو د پرېکړې څرنګتیا ناسمه ګڼلې وه.
مک کنزي د ۲۰۲۱ کال د اګست پر ۲۶ مه د کابل هوايي ډګر په دروازه کې ځانمرګی برید ترخه خاطره وبلله. په دغه برید کې چې داعش وسله والې ډلې یې مسوولیت پرغاړه واخست، ۱۸۲ تنه ووژل شول، چې ۱۳ تنه پکې امریکايي پوځیان وو.
