د ازادۍ جبهه: په کابل او کندز کې مو د دوو جلا بریدونو له امله پنځه تنه طالبان وژلي دي

د ازادۍ جبهې په یوې خبرپاڼه کې ویلي، چې د دوی له‌خوا په دوو جلا بریدونو کې د طالبانو پنځه تنه غړي وژل شوي او دوه تنه نور یې ټپیان کړي دي.

په خبرپاڼه کې لیکل شوي، لومړی برید یې د جمعې په ماښام د (تلې په ۱۳مه) د کابل ښار په ۱۷مه ناحیه کې کړی چې له امله یې درې تنه طالبان وژلي او یو بل تن یې ټپي کړی دی.
دغې جبهې په یوې بلې خبرپاڼې کې بیا د کندز د امام صاحب ولسوالۍ په بندر سیمه کې د یو بل برید خبر ورکړی او لیکلي یې دي، چې په دغه برید کې یې د طالبانو د استخباراتو دوه تنه غړي وژلي او یو بل یې ټپي کړی دی.
تر دې دمه طالبانو د ازادۍ جبهې د دغې ادعا په اړه څه نه دي ویلي او نه هم بلې خپلواکې سرچېنې د دغو ادعاو پخلی کړی.
افغانستان انټرنشنل هم د یوې خپلواکې او بې پرې رسنۍ په توګه د دغې ادعا تایید نه شي کولای؛ خو د ازادۍ جبهې وخت ناوخت پر طالبانو د بریدونو ادعاوې کړې او د طالبانو له ډلې سره په جګړه کې ځان ښکېل بولي.