په غزه د اسراییل په هوايي بریدونو کې ۱۱ تنه فلسطینیان وژل شوي
د غزې روغتیايي چارواکو د یکشنبې په ورځ وویل، چې د غزې په تړانګه کې د اسراییل د پوځ په بریدونو کې لږ تر لږه ۱۱ فلسطینیان وژل شوي دي. د دوی په وینا؛ د اسراییل الوتکو په څو شمالي، مرکزي او سویلي سیمو بمباري کړې ده.
د غزې په شمال کې د بیت لاحیا په سیمه کې د بې ځایه شویو فلسطینیانو په یوه ډله چې یو ښوونځی یې د سرپناه په توګه کاروه، برید شوی څلور تنه په کې وژل شوي او یو شمیر نور ټپیان دي.
د اسراییل پوځ ویلي، د حماس وسله وال یې په یو کمانډويي مرکز کې چې پخوا د ښوونځي په توګه کارېده، په نښه کړي دي.
دوی په حماس تور لګوي، چې د پوځي اهدافو لپاره د ملکي تاسیساتو او خلکو څخه ناوړه ګټه پورته کوي؛ خو حماس دغه تورونه ردوي.
فلسطیني ډاکټرانو وویل، چې په یو بل برید کې د غزې په ښار کې په یوه کور کې درې کسان وژل شوي دي.
د غزې تړانګې په مرکزي او سویلي سیمو کې په درېیو جلا - جلا بریدونو کې څلور تنه وژل شوي دي.
اسراییلي ځواکونو د مصر سره پولې ته څېرمه په رفح او د غزې د ښار په څنډه کې د زیتون په سیمه کې خپل عملیاتو ته دوام ورکړی، چیرې چې دغو ځواکونو د سیمې د اوسیدونکو او د حماس د رسنیو په وینا یو شمېر کورونه په بمونو الوځولي دي.
د یکشنبې په ورځ د اسراییل پوځ وویل، چې ځواکونه یې په "څو اړخیزه جګړه" کې نښتو ته دوام ورکوي او په غزه کې د یرغمل شویو کورونو د خوشې کولو او د حماس د "منځه وړلو" لپاره عملیات کوي.
د پوځ په وینا؛ اسراییلي سرتېرو د غزې په مرکزي برخه کې د استوګنې ودانیو او ملکي سیمو ته نږدې د ځمکې لاندې یو تونل کشف کړی او له منځه یې وړې دی.
پوځ ویلي، چې په دغه تونل کې یې ډېری تجهیزات موندلي چې د اوږدې مودې راهیسې د حماس له خوا کارول کیده.
د غزې د روغتیایي چارواکو په وینا؛ د غزې د ۲.۳ میلیون نفوس ډېری برخه د جګړې له امله بې ځایه شوي، او په وروستیو جګړو شاوخوا ۴۱ زره ۵۰۰ فلسطینیان وژل شوي دي.
د اسراییل او حماس تر منځ وروسته له هغې جګړې پیل شوې، چې تېر کال د اکتوبر په اوومه د فلسطیني اورپکو ډلې وسله والو د اسراییل پر سویلي سیمو برید وکړ، چې له امله یې ۱۲۰۰ کسان ووژل شول او شاوخوا ۲۵۰ تنه یرغمل شول.
