روسیه وايي، په کورسک سیمه کې د اوکراین په برید کې ۳۱ ملکي وګړي وژل شوي دي
د روسیې د بهرنیو چارو وزارت د دوشنبې په ورځ اعلان وکړ، چې د سپټمبر تر پنځمې نېټې پورې د دغه هېواد په کورسک سیمه کې د اوکراین په برید کې ۳۱ ملکیان وژل شوي او ۲۵۶ نور ټپیان شوي دي. اوکراین د اګست په شپږمه له دویمې نړۍوالې جګړې وروسته د روسیې پر خاوره تر ټولو ستر بهرنی برید وکړ.
اوکرایین د بې پېلوټه الوتکو او درنو وسلو په یوه برید کې چې د لوېدیځ له خوا جوړې شوې وسلې هم پکې شاملې وې، د روسیې په لوېدیځ کې د کورسک سیمه په نښه کړه.
روسي چارواکو ویلي، چې تر برید وروسته ۱ لک او ۳۰ زره ملکي وګړي د کورسک له خطرناکو سیمو وتلي دي.
د اوکرایین ولسمشر ولادیمیر زلنسکي ویلي، چې د روسیې پر خاوره یې د دغه هېواد د برید په پایله کې له لومړۍ کرښې لسګونه زره روسي پوځیان اېستلي دي.
