په خارکیف کې د روسانو د ۴ میاشتو تلفات په افغانستان کې د لویدیځ له ۲۰ کلونو تلفاتو ډېر دي
د خارکیف د ځواکونو عملیاتي او تاکتیکي ګروپ د دوشنبې په ورځ (سپټمبر په ۲۳ مه) پر ټېلېګرام خپور کړي راپور کې ویلي، چې د می میاشت له ۱۰مې څخه د سپټمبر تر ۲۱ نیټې پورې شاوخوا ۵ زره ۴۲۶ روسي سرتېري د خارکیف په لومړۍ برخه کې وژل شوي او ۱۰زره ۹۵۸ نور ټپیان شوي دي.
دا په داسې حالې کې ده چې د متحده ایالاتو، انګلستان، کاناډا، فرانسې، جرمني، ایټالیا او نورو لویدیځ هیوادونو ایتلاف په افغانستان کې د ۲۰ کلونو څخه په ډیره موده کې (۲۰۰۱-۲۰۲۱) ټولټال ۳ زره ۵۰۰ سرتېري له لاسه ورکړي وو.
د افغانستان په جګړه کې ۲۴۰۰ امریکایان وژل شوي وو، دا د هغه سرتېرو نیمایي برخه ده، چې روسیې یوازې د اوکراین په خارکیف کې په څلورو میاشتو کې له لاسه ورکړی.
په دغه راپور کې راغلي، چې په همدې موده کې اوکرايني ځواکونو په دغه سیمه کې د روسیې ۱۴۳ ټانکونه په نښه کړي، چې ۶۹ يې ويجاړ شوي دي.
د راپور له مخې؛ په دغه سیمه کې ۷۷روسي زغره وال جنګي ګاډي زیانمن شوي او ۱۳۴ نور یې له منځه تللي دي.
په ټولیز ډول د روسیې ۱ زر ۴۶۴ موټر تخریب شوي، ۷۶۲د توغندیو سیسټمونه یې هم په نښه شوي او ۲۱۲ یې تخریب شوي دي.
په راپور کې ویل شوي، چې په یادو عملیاتو کې د روسیې ۴ زره ۴۵۸ بېلابېلې موټرې او ۱۵۲ د مهماتو ډیپوګان له منځه وړل شوي دي.
د اوکراین لوی درستیز ویلي، چې په تیرو ۲۴ ساعتونو کې په اوکراین کې د یو زر ۳۳۰ روسي سرېیرو ته مرګ ژوبله اوښتې ده.
دغه هېواد ادعا کوي، چې په تېرو دوو کلونو د روسیې د یرغل له پیل راهیسې څه باندې ۶۴۳ روسي سرتېري په اوکراین کې یا وژل شوي او یا هم ټپیان شوي دي.
