د طالبانو عامې روغتیا وزارت: لغمان کې د ایډز ناروغۍ د تشخیص مرکز پرانیستل شو
د طالبانو د عامې روغتیا وزارت وايي، چې د لغمان په مرکز مهترلام ولایتي روغتون کې دننه یې د ایډز ناروغۍ یو مرکز پرانیستی دی. دغه وزارت وايي، یاد مرکز په اړوند برخه کې په پرمختللو وسایلو سمبال دی.
د طالبانو د عامې روغتیا وزارت تېره ورځ یکشنبه د (تلې لومړۍ نیټه) د یوې خبرپاڼې په خپرولو سره ویلي، چې د لغمان په ولایتي روغتون کې دننه یې د ایډز ناروغۍ د تشخیص یو مرکز پرانیستی.
خبرپاڼه زیاتوي چې د دغه مرکز لپاره په مسلکي ډول کسان له وړاندې روزل شوي و، خو په اړوند برخه کې د روغتیايي وسایلو تر بشپړېدو وروسته دغه مرکز اوس پرانیست.
په خبرپاڼه کې د لغمان د عامې روغتيا د مشرډاکټر سميع الله عابد نيازي له قوله لیکل شوي، چې «د دغه مرکز د کارکوونکو د ګومارلو او روزنې چارې ترسره شوې او د طبي او غير طبي وسايلو په بشپړېدو سره اوس دغه مرکز په رسمي ډول فعال شو.»
د طالبانو په دغې خبرپاڼه کې ویل شوي، چې په یاد مرکز کې به یوازې د ایډز ناروغۍ تشخیص کیږي، خو دا یې نه دي ویلي چې په دغې ناروغۍ اخته کسان به څنګه ژغورل کیږي.
طالبانو په خبرپاڼه کې په افغانستان کې د ایډز په ناروغۍ د اخته کسانو شمېر هم نه دی یاد کړی او دا یې نه دي ويلي چې ولې یې لغمان د دغه مرکز د جوړېدو لپاره ټاکلی.
