اسټراليايي رسنۍ:په افغانستان کې د واکسين ځنډول په سیمه کې د پوليو د خپرېدو لامل ګرځي
د اسټرالیا «کنورسېشن» رسنۍ خبرداری ورکړی، چې په افغانستان کې د طالبانو له خوا د پولیو د واکسین کمپاین ځنډول ښايي د سیمې په هېوادونو کې د ګوزڼ ناروغۍ د خپرېدو لامل شي. افغانستان او پاکستان هغه دوه هېوادونه دي چې نه دي توانیدلي د ګورڼ ناروغي له منځه یوسي.
په دغه راپور کې چې د دوشنبې په ورځ د تلې په دویمه خپور شو، ویل شوي چې د ګوزڼ ضد واکسین د کمپاین ځنډېدو له امله د افغانستان او پاکستان تر منځ لارو کې د خلکو ګڼې ګوڼې له امله پاکستان هم د پولیو د ناروغۍ خطر زیات کړی.
د روغتیا نړۍوال سازمان سږ کال په افغانستان کې د پولیو ۱۸ او په پاکستان کې ۱۷ نوې پېښې تایید کړې دي.
د پاکستاني چارواکو د معلوماتو له مخې؛ تر اوسه په دغه هېواد کې د پولیو د مثبتو پېښو شمېر ۲۱ ته رسېدلی دی.
دا په داسې حال کې ده، چې تېر کال په افغانستان کې د پولیو یوازې شپږ پېښې ثبت شوې وې.
دغو احصایو ته په اشارې سره دغه اخبار لیکلي، چې په افغانستان کې د پولیو د پېښو زیاتوالی «ډېر چټک» دی.
په دغه راپور کې ویل شوي، چې د واکسینو ځنډېدل سره به په نږدې راتلونکي کې په ماشومانو کې د پولیو پېښې زیاتې شي.
د راپور له مخې؛ دا وېروس کولی شي په سیمه او په ځانګړې توګه په هند او ایران کې هم د ماشومانو د فلج لامل شي.
پولیو یو ساري وېروس دی، چې په عمده توګه د پنځو کلونو څخه کم عمر لرونکي ماشومان اغېزمن کوي، مګر هغه څوک چې واکسین شوي نه دي د دې ناروغۍ له ګواښ سره مخ دي.
تر دې مخکې اسوشېټېډ پرېس د ملګرو ملتونو په حواله راپور ورکړی و، چې طالبانو د پولیو واکسین کمپاین بند کړی دی.
د دغه راپور په غبرګون کې د طالبانو د روغتیا وزارت ویاند شرف زمان ویلي وو، چې د واکسین د بندیز په اړه تر اوسه کوم رسمي مکتوب نه دی صادر شوی.
د پولیو د واکسین په کمپاین کې ښکېلو روغتیايي سرچینو ګارډین ورځپاڼې ته ویلي، چې طالبانو د امنیتي اندېښنو او په دې کې د ښځو د ونډې له کبله په موقت ډول دغه کمپاین ودراوه.
