اسراییل د حزب الله تر ۳۰۰ زیات مرکزونه په نښه کړي او تر ۲۰۰ ډېر کسان یې وژلي دي
اسراییل د دوشنبې په ورځ د حزب الله په سلګونو مرکزونه په هوایي بریدونو کې په نښه کړي، چې د لبنان روغتیایي چارواکو په وینا لږ تر لږه ۲۰۰ کسان یې وژلي دي.
د غزې د جګړې له پیل راهیسې په تېر یو کال کې د حزب الله او اسراییل تر منځ په سرحدي سیمو کې نښتې روانې وې؛ خو په تېرو ورځو کې اسراییل د سیمې خلکو ته خبرداری ورکړ، چې هغه سیمې پرېږدي چیرې چې ویل کیږي وسله والې ډلې وسلې موجودې دي.
د غزې په سویلي پوله کې د حماس پر وړاندې له شاوخوا یو کال جګړې وروسته اسراییل خپل تمرکز شمالي پولو ته اړولی، دا هغه سیمه ده، چې د ایران ملاتړي حزب الله د خپل متحد حماس په ملاتړ پر اسراییل توغندي توغوي.
د اسراییل د دفاع وزیر یوف ګالنټ په یوه ویډیو کې چې د هغه د دفتر له خوا خپره شوې، ویلي: «عملیات به تر هغه دوام وکړي تر څو چې موږ خپل هدف ته ورسیږو او د شمالي سیمو اوسېدونکي په خوندي ډول خپلو کورونو ته راستانه کړو.»
هغه دا څرګندونې وروسته له هغې وکړې، چې د اسراییل پوځ د لبنان په سویل، ختیځ بیکا دره او سوریې ته نږدې په شمالي سیمه کې د حزب الله مرکزونه په نښه کړل.
د لبنان د روغتیا وزارت وايي، د دوشنبې په ورځ د اسراییل په بریدونو کې د ښځو، ماشومانو او ډاکټرانو په ګډون لږ تر لږه ۲۰۰ کسان وژل شوي او تر ۴۰۰ ډېر ټپیان شوي دي.
د اسراییل د پوځ ویاند اویچای ادرای پر اېکس خپور کړي پیغام کې وویل، چې د حزب الله تر ۳۰۰ ډېر مرکزونه په نښه شوي او په لبنان کې په هغه کورونو باندې هوایي بریدونه په پام کې نیول شوي چې "حزب الله په کې وسلې پټې کړې" وې.
حزب الله ویلي، چې د دغو بریدونو په ځواب کې یې د اسراییل پر پوستو توغندي توغولي دي.
د اسراییل د پوځ ویاند ویلي، اسرايیلي الوتکې د لبنان په بیکا دره کې د حزب الله په ستراتیژیکو وسلو د برید لپاره چمتووالی نیسي. پوځ په ملکي خلکو یې غږ کړی چې سمدستي له سیمې ووځي.
ریئر اډمیرل ډینیل هاګاري په یوه تلویزیوني بیان کې وویل: "اوس کومې چاودنې چې د لبنان په سویل کې لیدل کیږې، د حزب الله د وسلو چاودنې دي چې په کورونو کې دننه ځای پر ځای شوې وې. پر هر کور چې موږ برید کوو هلته وسلې شتون لري. راکټونه، توغندي، بې پیلوټه الوتکې چې د اسراییلي ملکي وګړو د وژلو لپاره کارول کیدې.".
هوايي بریدونو پر حزب الله فشار زیات کړی.
تر دې وړاندې په لبنان کې د پیجرونو چاودنې دغه هیواد سخت څپلی و او حسن نصرالله دغه بریدونه چې سلګونو کسانو ته یې مرګ ژوبله اړولې وه، په تاریخ کې بې ساري بللي وو.
د دې عملیاتو پړه پر اسراییل اچول شوې وه؛ خو اسراییل په دغه برید کې ښکیلتیا نه تایید کړې او نه یې هم رد کړې ده.
د لبنان د روغتیا وزارت په وینا؛ په یوه بله لوی برید کې د جمعې په ورځ د بیروت په سویلي څنډه کې اسراییلي الوتکو د حزب الله جګپوړي قوماندانان په نښه کړل او ۴۵ کسان یې ووژل.
