ای سي ار سي: تېرو ۶میاشتو کې مو د ۹۹۴۵۷ تنو معلولینو سره په فزیکي بیارغونه کې مرسته کړې
د سره صلیب نړۍواله کمېټه (ای سي ار سي) وايي، چې په تېرو شپږو میاشتو کې یې د اوو مرکزونو له لارې له ۹۹ زرو څخه د زیاتو اړمنو معلولینو سره د فزیکي بیارغونې په برخه کې مرسته کړې ده.
دغه اداره وايي، په همدې موده کې له دوی سره ۸۶۴۶ نوي معلولین هم ثبت شوي چې په دې ډله کې د ۵۸۹ تنو یې لاسونه او پښې پرې شوې دي.
د ای سي ار سي د شپږ میاشتیني راپور په یوې بلې برخه کې راغلي، چې دوی نږدې ۱۶ زره نورې مصنوعي پښې او لاسونه چمتو کړي چې د اړتیا پر مهال یې پر اړمنو کسانو ووېشي.
دا رنګه د سره صلیب نړۍواله کمېټه وايي، چې د نږدې ۶۸ زره کسانو لپاره یې د فزیوتراپۍ خدمتونه هم وړاندې کړي دي.
د دغه راپور په یوه بله برخه کې د هغو پورونو یادونه هم شوې، چې اړمنو او معلولو کسانو ته ورکړل شوي چې دوی ځانته کار پیدا او ځان بسیاینې ته ورسېږي.
دغه بنسټ وايي ،چې ۲۸۴ کسانو ته یې دغه پورونه ورکړي او ۱۸۰ تنو ته یې مسلکي زدهکړې ورکړې دي.
په افغانستان کې د سره صلیب نړۍوالې کمېټې په ۱۹۷۹ کال کې خپل فعالیت پیل کړی، چې هغه مهال یې د افغانستان تر څنګ د بلوچستان په کوټه او د خیبر پښتونخوا په پېښور کې هم په جګړه کې د ټپي شویو افغانانو درملنه کوله.
دغه بنسټ له هغه وروسته په ۱۹۸۷ زېږدیز کال کې خپله دایمي استازولي په پلازمېنه کابل کې هم پرانیستله.
دغه اداره دمګړۍ د افغانستان د سرې میاشتې ټولنې سره په ګډه کار کوي او دا مهال ۱۹۰۰ کارکوونکي لري، چې په بېلابېلو برخو کې د بشري مرستو د رسولو چارې مخته وړي.
د دغې ادارې په خبره چې د دوی کاري ډلې نن سبا د روغتیا څارنې، بیارغونې، ملاتړ، اوبو رسولو او د خوړو د خوندیتوب په برخو کې د خوست، هرات، هلمند، کندهار، کابل، بلخ، کندز، بدخشان، ننګرهار، غزني او په فراه ولایتونو کې په کار بوختې دي.
