اوکرایني چارواکو د جمعې په ورځ (د وږي نهمه) وویل، چې روسیې د اوکراین په شمالي ښار سومي کې پر یوې فاریکې برید کړی. د چارواکو په وینا، برید کې دوه ښځې وژل شوي او لږ تر لږه ۱۱ نور کسان ټپیان دي او فابریکه هم ویجاړه شوې ده.
د اوکراین د لوی څارنوال دفتر وویل، چې دغه فابریکې د ماشومانو لپاره د خواړو، جوسونو او کورنیو محصولاتو بسته بندۍ کوله.
سیمه ییزو څارنوالانو په ټیلیګرام ټولنیزې شبکې خپور کړي پیغام کې وویل، چې په برید کې ټپي شوی یو کس وروسته په روغتون کې مړ شوی، او د یو بل قرباني جسد له خاورو راوېستل شوی دی. د برید له امله په دغه فابریکه کې اورلګیدنه رامنځ شوې ده.
چارواکو د سیمې له اوسیدونکو غوښتي، چې د کور دننه پاتې شي او د هوا د ککړتیا له امله د کورونو کړکۍ بندې وساتي.
شمالي سومي سیمه د روسیې له کرسک سیمې سره ګډه پوله لري چیرې چې اوکراین د اګست له شپږمې راهیسې د پولې په اوږدو کې لویې روسي سیمې نیولي دي.
د اوکراین سرحدي سیمې د روسیې له پرله پسې بریدونو سره مخ دي، او کییف ویلي چې پر کرسک سیمه یې ځکه عملیات کړي چې خپلې سرحدي سیمې خوندي کړي.
د سیمې والي فیلیپ پرونین وویل، چې د بې پیلوټه الوتکې په یو بل برید کې صنعتي تاسیسات په نښه شوي خو کون تاوان یې نه دی اړولی.
د اوکراین هوايي ځواک ویلي، چې د شپې له خوا یې په پنځو سیمو کې د روسیې له ۱۸بې پیلوټه الوتکو څخه ۱۲ نسکورې کړي او اا چې څلور بې پیلوټه الوتکې د اوکراین په خاوره کې غورځیدلي دي.
د اوکراین هوايي ځواک زیاته کړه، چې روسیې د برید پر مهال د اسکندر-ایم توغندی هم کارولی دی خو په دې اړه یې نور جزییات نه دي وړاندې کړي.
روسیې په قصدي توګه د ملکي وګړو په نښه کول په کراتو رد کړي، خو په ۲۰۲۲ کال کې د دغه هیواد د یرغل له پیل راهیسې روسیې پوځیانو په زرګونه کسان د جګړې پر مهال وژلي او ټپیان کړي دي.