کمالا هرېس: په غزه کې د اوربند وخت رارسېدلی دی
د امریکا د ولسمشر مرستیالې او د ولسمشریزو ټاکنو نوماندې کمالا هرېس د ډیموکراټ ګوند ملي کنوانسیون ته په وینا کې وویل، چې اوس په غزه کې د اوربند او د یرغمل شوو کسانو د خوشې کولو وخت رارسېدلی.
هغې ویلي، هر څه چې په غزه کې پېښ شوي خورا ویجاړوونکي او زړه بوږنوونکي دي.
د هغې په وینا:« ولسمشر جو بایډن او زه د دې جګړې پای ته رسولو لپاره کار کوو.»
کمالا هرېس په رسمي توګه د امربکا ولسمشریزو ټاکنو لپاره د ډیموکراټ ګوند لهخوا نوماندي ومنله.
کمالا هرېس ویلي، دا به خطرناکه وي چې ډونالډ ټرمپ بېرته سپينې ماڼۍ ته ورستون شي؛ هغه به هغه توند لاري ازاد کړي چې په کپيټل هېل یې برید کړی و.
هغې زیاته کړې:« ټرمپ غواړي چې هېواد بېرته پر شا ولاړ شي؛ خو موږ په امریکا کې شاتګ نه منو.»
له بل پلوه حماس په غزه کې د جګړې د پای ته رسېدو او په اسراییل کې د فلسطیني بندیانو د خلاصون په بدل کې د اسراییلي او بهرنیو یرغمل شویو د خوشې کولو لپاره یوه هوکړه غواړي.
حماس امریکا او اسراییل د اوربند هوکړې ته پر نه رسېدو تورنوي.
ورته مهال د اسراییل لومړي وزیر بنیامین نتنیاهو ویلي، چې جګړه به هغه وخت پایته ورسېږي چې حماس ماته وخوري او د یرغمل شویو او بندیانو د خلاصون لپاره به اوربند لنډمهالی وي.
د هغه په وینا، حماس اوس هم د اسراییل لپاره ګواښ دی.
