د غزې کړکېچ: په غزه کې د اسراییل په تازه برید کې لږ تر لږه ۲۲ فلسطینیان وژل شوي دي

رویټرز خبري اژانس راپور ورکړی، چې اسراییلي ځواکونو د پنجشنبې په ورځ د غزې تړانګې د مرکزي او سوېلي سیمو په لور د پرمختګ په حال کې د حماس له ځواکونو سره نښته کړې. د فلسطین د عامې روغتیا وزارت اعلان کړی، چې په دې نښتو او تازه بریدونو کې ۲۲ کسان وژل شوي دي.

د راپورونو له مخې؛ په بیت‌لاهیا ښار کې یوازې په یوه کور کې د برید له امله ۱۱ کسان او په المغازي پنډ‌غالي کې بیا په بل برید کې د یوه سیمه ییز خبریال په ګډون شپږ کسان وژل شوي دي.
پنځه نور کسان بیا د غزې په سوېل کې په بېلابېلو بریدونو کې وژل شوي دي.
د اسراییل پوځ ویلي، چې په تېرو ۲۴ ساعتونو کې یې د غزې په دېرالبلاح او سوېل خان یونس کې عملیاتو ته زور ورکړی او د حماس د لسګونو جنګیاليو د وژلو ترڅنګ یې د یادې ډلې پوځي تجهیزات کشف کړي دي.
د اسراییل د پوځ په خبره، تېره ورځ یې د رفح ښار کې د حماس ۵۰ جنګیالي وژلي دي.
دا نښتې له هغه وروسته زیاتې شوې، چې د امریکا ولسمشر جوبایډن د کاملا هارېس په حضور کې د اسراییل له لومړي وزیر بنیامین نتنیاهو سره په ټیلیفوني خبرو کې په غزه کې داوربند لپاره د يوې هوکړې پر اهميت او د يرغمل شويو کسانو په ازادولو ټينګار وکړ.
حماس په غزه کې د جګړې د پای ته رسېدو او په اسراییل کې د فلسطیني بندیانو د خلاصون په بدل کې د اسراییلي او بهرنیو یرغمل شویو د خوشې کولو لپاره یوه هوکړه غواړي.
دا ډله امریکا او اسراییل د اوربند هوکړې ته پر نه رسېدو تورنوي.
نتنیاهو ویلي، چې جګړه به هغه وخت پایته ورسېږي چې حماس ماته وخوري او د یرغمل شویو او بندیانو د خلاصون لپاره به اوربند موقتي وي.
د نوموړي په وینا؛ حماس اوس هم د اسراییل لپاره ګواښ دی.
د غزې روغتیایي چارواکي وایي، چې د اسراییل او حماس ترمنځ د جګړو له پیل راهیسې څه باندې ۴۰ زره کسان وژل شوي دي.