امریکا د اسراییل د دفاع لپاره د ابراهام لېنکن اوبتل منځني ختیځ ته واستاوه

د امریکا د دفاع وزارت ویلي، چې د دغه هېواد د دفاع وزیر لوید اسټن منځني ختیځ ته د ابراهام لېنکن اوبتل د استولو امر کړی دی. دغه اوبتل په لارښودو توغندیو سمبال دی او سیمې ته په داسې حال کې استول شوی چې د ایران او اسراییل ترمنځ ترینګلتیا په زیاتېدو ده.

د امریکا د دفاع وزارت د یکشنبې په ورځ د (زمري ۲۱مه) ویلي، چې لوید اسټن دغه امر د اسراییل د دفاع له وزیر یوف ګالانت سره له اړېکې وروسته صادر کړ.

د امریکا د دفاع وزارت په خبرپاڼه کې راغلي دي: «لویډ اسټن د امریکا پر ژمنې ټینګار وکړ چې د اسراییل د دفاع لپاره به هر ممکن ګام واخلي او د سیمه ییز تاوتریخوالي زیاتېدو ته په کتو به په ټول منځني ختیځ کې د امریکا د دریځ او پوځي وړتیاو د پیاوړتیا لپاره پام ډیر کړي.»

امریکا منځني ختیځ ته داسې مهال دیوه نوي اوبتلد استولو خبر ورکړی، چې د جورجیا (یو ایس ایس) اټومي اوبتل د جولای له میاشتې راهیسې په مدیترانې سمندرګي کې دی.

په تهران کې د حماس د سیاسي دفتر د مشر اسماعیل هنیه له وژل کېدو او پر اسراییل د ایران او ملګرو له خوا د بریدونو د ګواښونو له زیاتېدو وروسته امریکا ویلي، چې سیمې ته به نور جنګیالي او جنګي بېړۍ واستوي.