د غزې کړکېچ؛ اسراییل د غزې د نورو سیمو خلکو ته هم امر کړی چې خپل کورونه پرېږدي
اسراییلي پوځ تېره شپه د غزې په سوېل کې د خان یونس په سیمه کې خلکو ته امر کړی، چې خپل کورونه پریږدي. دغه امر د سیمې په لسګونو زره فلسطیني اوسېدونکي او بې ځایه شوې کورنۍ مجبورې کړې، چې په تیاره کې خپل کورونه په داسې حال کې پریږدي چې د ټانک مرمۍ یې په شاوخوا کې لګیدلې.
د اسراییل پوځ ویلي، چې د حماس ډلې پر وسله والو یې برید کړی، چې له جګړې مخکې یې غزه اداره کوله او دا چې اوس یې له دغو سیمو د بریدونو او راکټونو د ویشتلو لپاره کار اخیسته.
د شنبې په ورځ د غزې په ښار کې د بې ځایه شویو فلسطینیانو په یو ښوونځي باندې د اسراییل په هوايي برید کې لږ تر لږه ۹۰ تنه وژل شوي وو، چې د نړۍوال غبرګون لامل شو.
د اسراییل پوځ ویلي، چې د حماس او اسلامي جهاد وسله والو پر یوې پوستې یې برید کړی، او ۱۹ وسله وال یې وژلي دي.
د غزې تړانګې په سوېل کې په خان یونس سیمه کې د کورونو د تخلیې امر، په تېره لس میاشتنۍ جګړه کې د تخلیې یو تر ټولو پراخ امر بلل کیږي.
دا په داسې حال کې ده، چې اسراییلي ټانکونه هم دغې سیمې ته راستانه شوي دي.
د کورونو د تخلیې دغه اعلان د اېکس خواله رسنۍ او د ټلیفوني پیغامو پر مټ شوی، چې پکې راغلي:
"د خپل ځان د خوندیتوب لپاره تاسو باید سمدستي نوي رامنځته شوي بشردوستانه زون ته لاړ شئ. هغه سیمه چې تاسو په کې یاست یو خطرناکه جنګي سیمه ګڼل کیږي."
د فلسطیني کډوالو لپاره د ملګرو ملتونو د ادارې مشر فیلیپ لازاریني ویلي، چې په غزه کې خلک بند پاتې دي او د تګ ځای نه لري.
هغه وويل: "ځينې يوازې د دې وړتيا لري چې خپل ماشومان له ځانه سره یوسي، ځينې نور خپل ټول ژوند په يوې وړه کڅوړه کې له ځانه سره وړي. هغوى له ګڼې ګوڼې ډکو ځايونو ته ځي چېرته چې کورونه او کمپونه لا له وړاندې له خلکو ډک وي. هغوى هر څه له لاسه ورکړي او هرڅه ته اړتيا لري."
