محمود عباس: د حماس د مشر وژنه د غزې د جګړې د اوږدولو په موخه شوې ده
رویټرز خبري اژانس راپور ورکړی، چې د فلسطین ولسمشر محمود عباس د سه شنبې په ورځ رسنیو ته ویلي، د حماس د مشر اسماعیل هنیه وژنه د غزې د شخړې د اوږدولو په موخه وه. هغه زیاته کړې، چې هغه به په مسکو کې د ولسمشر ولادیمیر پوتین سره د دغه کړکېچ په اړه خبرې وکړي.
ښاغلي عباس وویل، چې دی د هنیه وژنه د اسراییل په سیاست کې یوه «ناځوانه کړنه» او خطرناک پرمختګ ګڼي.
محمود عباس د روسیې له دولتي خبري اژانس سره په مرکه کې ویلي:« په دې کې شک نه شته، چې د ښاغلي هنیه د وژنې موخه د جګړې اوږدول او د هغې د پراخولو لپاره شوې ده.»
ښاغلي عباس په هغو څرګندونو کې چې په روسي ژبه خپرې شوې او د رویټرز لهخوا ژباړل شوې دي وویل:« دا به د تېري پای ته رسولو او له غزې څخه د اسراییلي سرتېرو د وتلو لپاره په روانو خبرو اترو منفي اغېز وکړي.»
هغه ویلي، پلان لري چې له پوتین سره په سیمه کې د سولې پر بهیر خبرې وکړي.
د هغه په وینا:« موږ په دوامداره توګه د روسیې له ولسمشر سره د نظرونو تبادله کوو، د سولې پروسې د پرمختګ لپاره په ټولو مهمو مسلو سلا مشوره کوو او همدارنګه د دوه اړخیزو او سیمهییزو اړیکو د پیاوړتیا لپاره سره خبرې کوو.»
له بل پلوه د امریکا د بهرنیو چارو وزیر انتوني بلېنکن ویلي، منځنی ختیځ له یوه نازک وضعیت څخه تېرېږي.
هغه ویلي، ټولې خواوې باید د کړکېچ له زیاتېدو ډډه وکړي.
انتوني بلېنکن وایي، چې امریکا په منځني ختیځ کې د کړکېچ د کمولو لپاره ډیپلوماټیکې هڅې کوي.
هغه وویل، په غزه کې د اوربند هوکړې ته د رسېدو لپاره دا ډېره اړینه ده چې ټولې خواوې یوې هوکړې ته د رسېدو لارې چارې بیامومي.
