د ایران او سراییل کړکېچ؛ ایران وايي، سیمه ییزه جګړه نه غواړي خو اسراییل ته باید سزا ورکړي
د ایران د بهرنیو چارو د وزارت ویاند د دوشنبې په ورځ په تهران کې د حماس د مشر اسماعیل هنیه له وژل کېدو وروسته وویل، چې هېواد یې د سیمه ییزو جګړو د زیاتولو په لټه کې نه دی؛ خو باور لري چې د نورې بې ثباتۍ د مخنیوي لپاره باید اسراییل ته سزا ورکړي.
ناصر کنعاني وویل: “ایران په سیمه کې د ثبات د رامنځته کولو په لټه کې دی؛ خو دا کار یوازې د تېري کوونکي په سزا ورکولو او د صهیونیسټي رژیم (اسراییل) د جرئت په وړاندې د مقاومت په کولو سره رامنځته کیږي.”
کنعاني پر امریکا غږ وکړ، چې د اسراییل له ملاتړه لاس واخلي او زیاته یې کړه، چې نړۍواله ټولنه په سیمه کې د ثبات د ساتلو په برخه کې په خپله دنده کې پاتې راغلې او باید د تېري کوونکي د سزا ملاتړ وکړي.
د ایران د بهرنیو چارو وزارت د دوشنبې په ورځ په تهران کې مېشت سفیران او د ډېپلوماټیکو ماموریتونو مشران د بهرنیو چارو له سرپرست وزیر علي باقري کُني سره د کتنې لپاره راوبلل او ټینګار یې وکړ، چې د ایران اراده به اسراییل ته ځواب ورکړي.
کنعاني وویل، چې د اسلامي همکاریو د سازمان بېړنۍ غونډه به د چهارشنبې په ورځ د ایران په غوښتنه جوړه شي، چې د هنیه د وژنې او د ایران د ځواب په اړه به پکې خبرې وشي.
تهران او د ایران سره تړلې ډلې لکه حماس او حزب الله وايي، چې اسراییل د جولای په ۳۱مه د ایران په پلازمینه کې هنیه وژلی دی.
د هغه مړینه د حماس د لوړ پوړو شخصیتونو د وژنو د لړۍ برخه ده، چې په غزه کې د حماس او اسراییل ترمنځ د ۱۱ میاشتنۍ جګړې سره هممهاله دوام لري.
اسراییلي چارواکو د هنیه د وژلو مسوولیت پر غاړه نه ده اخیستې.
