د هند په کېرالا کې د ځمکې ښویېدنې له امله تر سلو زیات کسان مړه شوي دي

د سه شنبې په ورځ د کېرالا د وایاناډ ولسوالۍ په بېلابېلو غرنیو سیمو کې د ځمکې ښویېدنې له امله د مړو شویو کسانو شمېره ۱۲۳ تنو ته لوړه شوه. د راپورونو له مخې، ۱۲۸ ټپیان د درملنې لپاره روغتون ته لېږدول شوي دي.

ځمکښویېدنې ګڼ کورونه نړولي، ونې یې غورځولې او د راټولو شوو اوبو له امله د ژغورنې چارې له خنډ سره مخ شوې دي.
د کېرالا وزیر اعلی پېنارای ویجیان وویل، دا یوه له خورا سختو طبیعي پېښو څخه ده او تر دې دمه تر ۳۰۰۰ ډېر کسان ۴۵ کمپونو ته لېږدول شوي دي.
ویجیان وویل: "لا هم خلک تر ځمکې لاندې بند پاتې دي. د موندلو هڅې به دوام ولري. د ژغورنې عملیاتو ته د دوام ورکولو لپاره به ټولې ممکنه سرچینې او میتودونه وکارول شي."
له بل پلوه د هند د هوا پېژندنې څانګې د ویاناډ لپاره یوه خبرتیا خپره کړه، چې په سیمه کې د ډېر سخت باران اټکل کېږي.
د کېرالا وزیر اعلی د ژغورنې عملیاتو همغږي کولو او د نورو ګامونو په اړه بحث کولو لپاره د لوړې کچې غونډه وربللې ده.
تېره ورځ د هند لومړي وزیر نرېندرا مودي په ویاناډ کې د ځمکې ښویېدنې وروسته د کېرالا حکومت ته له مرکز څخه د هر ډول ممکنه مرستې ډاډ ورکړی و.
هغه په اېکس پاڼه لیکلي و، د ویاناډ په ځینو برخو کې د ځمکې ښویېدنې له امله ګڼ خلک زیانمن شوي دي.
هغه وړاندې کاږلي و:« د ټولو هغو کسانو لپاره اندېښمن یو، چې په دغه پېښه کې یې خپل عزیزان له لاسه ورکړي دي.»