ملګري ملتونه: په نړۍ کې د انساني قاچاق له هرو درېیو قربانیانو څخه یو یې ماشوم دی
ملګرو ملتونو سږ کال د انسانانو د قاچاق پر ضد د نړۍوالې ورځې په مناسبت د ماشومانو د قاچاق د پای ته رسولو لپاره د چټک اقدام غوښتنه کړې. دغه سازمان وايي، ماشومان په ټوله نړۍ کې د انساني قاچاقو د قربانیانو یوه مهمه برخه جوړوي او نجونې په نا انډوله توګه ترېنه اغېزمنې کېږي.
د جولای میاشتي ۳۰مه نېټه د انساني قاچاقو پر وړاندې د مبارزي نړۍواله ورځ ده.
ملګرو ملتونو “د انساني قاچاقو پر وړاندې مبارزه کې هیڅ ماشوم شاته مه پرېږدئ" شعار په ورکولو سره وايي، په نړۍ کې د انساني قاچاقو له هرو درېیو قربانیانو څخه یو یې ماشوم دی.
ملګري ملتونه وايي، په افریقا کې د سهرا سوېل، شمالي افریقا، لاتیني امریکا او کارابېن ټاپوګانو په څېر سیمو کې د انساني قاچاقو ۶۰ سلنه یې ماشومان دي.
ملګرو ملتونو د انساني قاچاقو پر وړاندې د مبارزې د نړۍوالې ورځې په اړه راپور کې ویلي، چې وسلهوالې شخړې، انتقالېدونکې ناروغۍ، اقتصادي او چاپېریالي ستونزې هغه ناورینونه دي چې انساني قاچاقو ته یې لاره هواره کړې ده.
په دغه راپور کې ویل شوي، چې د ماشومانو د قاچاقو لپاره انلاین پلټ فارمونه لکه د محافظت پرته انټرنېټې سایټونو سره نښلېدل، خواله رسنۍ، ډارک وېب څخه په ګټې اخیستنې هم د ماشومانو قاچاق کېږي.
د ملګرو ملتونو د راپور له مخې، ماشومان د قاچاق له بېلابېلو ډولونو سره مخ دي؛ لکه جبري کار، جرم، د نا قانونه پاللو لپاره قاچاق، په وسلهوالو ډلو کې استخدام او انلاین او جنسي استفادې لپاره ترې ګټه اخیستل کېږي.
په راپور کې بې وزلۍ، د کډوالۍ پر مهال د بې سرپرسته ماشومانو لپاره د ملاتړ نشتوالی، وسلهوالې شخړې، بې کاره کورنۍ او د مور او پلار له لوري د پام وړ پاملرنې نشتوالی، په ټیټ عاید لرونکو هېوادونو کې د جبري کار لپاره قاچاق کېدل د ماشومانو د قاچاقو د اصلي لاملونو په توګه یادېږي.
خو په لوړ عاید لرونکو هېوادونو کې د جنسي غرض پوره کول د ماشومانو د قاچاقو د لامل په توګه ګڼل کېږي.
د قرباني شویو ماشومانو په اړه دقیق راپور نه ورکول، د پوهاوي نشتوالی او د قربانیانو د ملاتړ لپاره د اړینو سرچینو نه شتون هغه ننګونې دي، چې د انساني قاچاقو پر مهال ډېر ماشومان قرباني کېږي.
ملګري ملتونه وايي، د ماشومانو قاچاقبران ډېری وخت د انساني قاچاقو پر قربانیانو د کڼترول ساتلو لپاره جبر، دوکه او ګواښونه کاروي، چې له امله یې د چارواکو لپاره په دې برخه کې مداخله ستونزمنه ده.
ملګري ملتونه وايي:« تر اوسه پورې، موږ د ماشومانو د قاچاقو مسله په اغېزمنه توګه نه ده حل کړې. د دغه ناوړه وضعیت د مخنیوي لپاره بېړنی او هر اړخیز اقدام اړین دی.»
ملګري ملتونه زیاتوي، چې د دغه ناورین سره د اغېزمنې مبارزې لپاره په ملي او نړۍواله کچه ګډو هڅو ته اړتیا ده.
د دوی په خبره دولتونه باید د ماشومانو خوندیتوب ته لومړیتوب ورکړي، قانون جوړ کړي، د قانون پلي کولو د ښهوالي تر څنګ د ماشومانو د قاچاق سره د مبارزې لپاره ډېرې سرچینې په کار واچوي.
