اتمر: بین الافغاني خبرې او سیاسي حل له افغان ښځو او مدني ټولنې پرته ناشونې ده

د پخواني حکومت د بهرنيو چارو وزیر وایي، چې بین الافغاني خبرې او سیاسي حل له افغان ښځو او مدني ټولنې پرته ناشونې ده. حنیف اتمر دغه خبرې په جرمني کې د ډېموکراسۍ او سولې تر عنوان لاندې د کلتوري ډېپلوماسۍ د انستیتیوت له لوري جوړ شوي کنفرانس کې وکړې.

نوموړي همداراز په خپلو خبرو کې وویل، چې د سيمې او نړۍ ټيکاو د افغانستان ټيکاو پورې تړلی دی.
ښاغلي اتمر دوحې ناستې ته په اشارې سره ټینګار وکړ، چې ورته ناستې هغه وخت اغېزناکې ثابتېدی شي، چې افغان ښځې، د سیاسي ګوندونو او د مدني ټولنې استازي هم په کې ګډون ولري.
که څه هم نوموړي د دوحې درېیمه ناسته له یوه اړخه اغېزمنه وستایله خو بل پلو یې وویل، چې د دې ناستې د ناکامېدو یوازینی علت دا و، چې ښځې او د مدني ټولنې غړي ترې و اېستل شول.
حنیف اتمر زیاتوي، چې که طالبان دا مسایل او غوښتنې په پام کې و نه نیسي هیڅ لوری به له دې ډلې سره پخلاینې ته چمتو نه شي.
د پخواني حکومت د بهرنيو چارو وزیر همداراز زیاتوي، چې که طالبان خپل سیاست او تګلاره بدله نه کړي، د نړۍ هېڅ یو هېواد به یې په رسمیت و نه پېژني.
ښاغلي اتمر په افغانستان کې د ترهګرو ډلو د پراخېدو په اړه خبرداری ورکړ او وایي، چې په افغانستان او پاکستان کې له ترهګرو سره دوه ګونی چلند کیږي.
حنیف اتمر وایي: «هغه څه چې لیدل کیږي دواړو هېوادونو ترهګر په ښه او بد ترهګر ویشلي، له ځینو سره یې جنګیږي او له ځینو نورو سره نه. دا ډول چلند له ترهګرو ډلو سره هر ډول مبارزه له ماتې سره مخ کوي.»
د پخواني حکومت د بهرنيو چارو وزیر پاکستاني طالبانو ته اشاره وکړه، چې دغه هېواد ورسره جنګیږي او له نورو طالبانو ملاتړ کوي.
له دې سره، طالبان بیا په افغانستان کې د داعش ډلې پر وړاندې جنګیږي او ادعا کوي، چې دا ډله په افغانستان کې ځپل شوې؛ خو له بلې خوا یې په هېواد کې القاعدې، د پاکستان تحریک طالبان او یو شمېر نورو ترهګرو ډلو ته ځای ورکړی دی.
طالبانو بیا په ځلونو دا څرګندونې بې بنسټه بللي او وایي، چې هیڅ یوې ډلې او هېواد ته د افغانستان له خاورې د استفادې اجازه نه ورکوي.