امریکا چین ته د روسیې د دفاعي صنعت د مرستې په اړه خبرداری ورکړی
د امریکا د بهرنیو چارو وزیر له خپل چینايي سیال سره په لیدنه کې خبرداری ورکړ، چې که چیرې دغه هیواد د روسیې د دفاعي صنعت سره مرستې ته دوام ورکړي امریکا به «مناسب ګامونه» واخلي. ښاغلي بلینکن په تایوان کې د چین پر «پارونکو کړنو» هم نیوکه وکړه.
بلینکن د شنبې په ورځ په سیمه ییزه سرمشریزه ناسته کې چې د روسیې، هند، چین، اسټرالیا او جاپان د ډیپلوماټانو په ګډون جوړه شوې وه، برخه اخیستې او خبرې وکړې او د چین د بهرنیو چارو له وزیر وانګیي سره یې هم وکتل.
د چين د بهرنيو چارو وزارت د يوې خبرپاڼې له مخې، وانګيي بلينکن ته وويل، سره له دې چې د چين او امريکا ترمنځ اړيکې ټينګې شوې دي، خو واشنګټن پر بېجينګ د بنديز او جبر مخه نه ده نيولې او نور یې هم سخت کړي دي.
وانګيي وويل: «د چين او امريکا د اړيکو پر وړاندې ګواښونه لا زیاتېږي او ننګونې مخ په زیاتېدو دي.»
په خبرپاڼه کې دا هم ویل شوي چې وانګیي بلینکن ته وویل، چې متحده ایالات د چین په اړه «ناسم درک» لري، «منطقي او عملي تګلارې» ته د راستنېدو غوښتنه یې کړې.
وړاندې په یوه ګډه خبرپاڼه کې، د ناټو ډیری مشرانو چین «د روسیې د صنعتي او دفاعي اډې قوي ملاتړی» بللی.
انټوني بلینکن د روان کال په غوايي میاشت کې ویلي، و چې امریکا د روسیې د دفاعي صنعت په بیارغونه کې د چین له مرستې اندېښمنه ده.
