د کاناډا په مونټریال کې د کډوالۍ د وزیر په دفتر شپې مهال برید شوی
د کاناډا د مونټریال پولیس د کډوالۍ د وزیر مارک میلر په دفتر د شوي برید په اړه په داسې حال کې څېړنې پیل کړي، چې د دغه دفتر د ودانۍ ښیښې ماتې شوي او په بېلابېلو برخو رنګ شیندل شوی دی.
دغه دفتر ته یو راغلي کډوال وروسته له هغه پولیسو ته زنګ ووهه، چې ولیده چې د دفتر ښیښې ماتې شوي او په کې دننه ګډوډي رامنځته شوې ده.
پولیسو ویلي، چې دغه ورانکاری برید د پنجشنبې په شپه شوی او کیدی شي د فلسطین پلوه لاریونونو سره تړاو ولري.
د پولیسو په وینا؛ په دفتر کې د ملکیت د زیان په ګډون ټوله ورانکاري له بهر څخه ترسره شوې او په ودانۍ او سړک کې "مارک میلر د ماشوم وژونکی" لیکل شوي دي.
په دې وروستیو کې په پرلپسې توګه د میلر دفتر مخې ته له دې امله لاریونونه شوي، چې د فلسطین پلوه کسان په فدرالي حکومت نیوکه کوي، چې د کاناډا د فلسطینیانو د کورنیو د غړو د راوستلو لپاره چې دا مهال په غزه کې بند پاتې دي، کافي کار نه کوي.
د کډوالۍ وزیر مارک میلر د پنجشنبې په ورځ پر اېکس خواله رسنۍ خپور کړي پیغام کې پر خپل دفتر شوی برید تایید کړ او ویې ویل: "دا یو جرمي عمل دی، چې زه یې په کلکه غندم."
میلر لیکلي: "زما همکاران خوندي دي، څوک ژوبل شوي نه دي. دا هغه څه دي چې مونږ ته خورا مهم دي."
تر اوسه د برید په اړه څوک نه دي نیول شوي، خو د پولیسو یو ویاند ویلي، چې دا پېښه د اسراییل او حماس له جګړې سره تړاو لري.
