د هند په جمو او کشمیر کې د ترهګرو سره په نښته کې څلور امنیتي سرتېري وژل شوي دي
په نوي ډیلي کې امنیتي ادارې مني، چې څلور امنیتي سرتېري یې نن سې شنبه د جمو او کشمیر په دودا ولسوالۍ کې ووژل شول. له بل پلوه تېره ورځ په ډیسا سیمه کې هم د وسلهوالو تر منځ په ډزو کې د پوځ یو سرتېري وژل شوی او پنځه نور سخت ژوبلیدلي وو.
دغه ځواکونه په ډیسا او جمو او کشمیر کې د دولت لهخوا د یو لړ ګډو ځانګړو عملیاتو په ترڅ کې وژل شوي او ټپیان شوي دي.
ویل کېږي، چې دغه دوه سیمې لاهم د امنیتي ځواکونو لهخوا کلابندې دي.
د هندي رسنیو د راپورونو له مخې، دغه نښته د تېرې شپې راهیسې د ځایي وخت په نهه بجو پیل شوې وه.
د ټایمز اف انډیا د راپور له مخې، سیمې ته تازه دمي ځواکونه استول شوي او دغه عملیات لاهم روان دي.
دا په داسې حال کې ده، چې د هند پوځ د یکشنبې په ورځ د جمو او کشمیر په کپواره ولسوالۍ کې د ترهکرو پر وړاندې عملیاتو کې درې ترهګر ووژل.
دغه عملیات وروسته له هغه پیل شول، چې په تېرو څو میاشتو کې د جمو او کشمیر په جمو څانګه کې یو لړ ترهګریز بریدونه شوي دي.
په دغو بریدونو کې د شپږو امنیتي سرتېرو په ګډون ۱۵ کسه وژل شوي او ۴۶ نور بیا ټپیان شوي دي.
