د جرمني په باډن ورتمبرګ ایالت کې د ډزو له امله درې تنه وژل شوي دي
د جرمني پولیسو ويلي، چې د باډن ورتمبرګ ایالت په سویل لویدیځ کې یوه سړي خپل ځان او دوه نور کسان په ډزو وژلي دي. په دې پیښه کې چې د یکشنبې په ورځ د لاوتلینګن په کلي کې وشوه لږ تر لږه دوې نورې ښځې سختې ټپیانې شوې دي.
تر اوسه د برید انګېزه معلومه نه ده او د پېښې د قربانیانو د هویت په اړه څه نه دي ویل شوي.
د المان د دويچه ويله رسنۍ د رپوټ له مخې؛ پوليس باور لري، چې دغه پيښه د کورنۍ شخړې له کبله رامنځ ته شوې او په سيمه کې نورو خلکو ته کوم خطر نه شته.
د دغه راپور له مخې؛ د پولیسو ویاند ویلي، چې نن غرمه شاوخوا ۱۲:۳۰ بجې وروسته له هغه، چې د ډزو د غږ له امله بېړنی زنګ ووهل شو، پولیس سیمې ته ورسېدل او هلته یې د مړو او ټپیانو جسدونه ولیدل.
