د هند لومړی وزیر مسکو ته ځي
د روسیې رسمي خبري اژانس ټاس د کرملین د سرچینو له قوله راپور ورکړی چې د هند لومړی وزیر نریندرا مودي به د دوشنبې مازدیګر مسکو ته ورسیږي. د ټاس د راپور له مخې، کرملین د ښاغلي مودي دوه ورځنی سفر یو «مهم سفر» بللی.
د دوه اړخیزو اړیکو پراختیا، سیمه ییز او نړیوال مسایل د روسیې له ولسمشر ولادیمیر پوتین سره د ښاغلي مودي په لیدنه کې د بحث وړ موضوع ګانې دي.
د کرملین ویاند دیمیتري پیسکوف ویلي چې دواړه مشران به غیر رسمي خبرې اترې هم ولري.
د پوتین مرستیال یوري اوشاکوف وویل چې کرملین دغې غونډې ته «لومړیتوب» ورکوي.
روسیې ته د ښاغلي مودي مخکینی سفر د هند د لومړي وزیر په توګه په ۲۰۱۹ کال کې شوی او تر هغه مخکې په ۲۰۱۵ کال کې مسکو ته تللی و.
هند تر اوسه پورې په رسمي ډول پر اوکراین د روسیې پوځي برید نه دی غندلی.
له امریکا سره د تودو اړیکو د ساتلو په ترڅ کې ډیلي له روسیې سره هم تودې اړیکې لري. د هند د پوځي تجهیزاتو یوه برخه له روسیې څخه صادریږي.
