بایډن: که پاک خدای راشي او راته ووايي، چې له ټاکنیزې سیالۍ څنګ ته شه نو دا کار به وکړم
جو بایډن اېبيسي نیوز ته ویلي، چې په اوسنیو حساسو تاریخي شېبو کې ټرمپ د نړۍ له پاره «ستر ګواښ» دی. هغه وایي، د نړۍ د پاشل کېدو د مخنیوي لپاره ځان مناسب کس ګڼي.
بایډن وویل: «که پاک خدای لاندې راکوز شي او را ته ووایي، له ټاکنیزو سیالیو لرې شه دا کار کوم؛ خو پاک خدای نه دی راکوز شوی.»
بایډن وویل، له ټرمپ سره د مناظرې پر مهال سخت ناروغه و او اړ شوی و چې د کرونا ازمېښت هم ترسره کړي.
بایډن د واشنګټن پوسټ د هغه راپور په غبرګون کې چې ډیموکراټ سناتور مارک وارنر غوښتل، چې دی دې له ټاکنیزو سیالیو تېر شي وویل: زه وارنر ته درناوی لرم؛ خو زموږ لید لوري سره توپير لري.
د ټرمپ سره د بایډن کمزوري دریځ، د هغه په اړه د ډیموکراټانو تر منځ یو لړ نېوکې له ځانه سره لرلې، چې ګواکې د هغه عمر او ځواکمنتیا د ولسمشرۍ لپاره مناسبه نه ده.
له دغې مناظرې وروسته د ډیموکراټ ګوند یو شمېر سترو مالي ملاتړو په ښکاره توګه د مرستو د بندولو خبرداری هم ورکړی و.
