ټېلګراف: کېیر سټارمر د خپلې دندې په لومړۍ ورځ روانډا ته د کډوالو د اېستلو تګلاره لغوه کړه
د ټېلګراف ورځپاڼې راپور ورکړی، چې د بریټانیا نوي لومړي وزیر کېیر سټارمر په خپلې لومړۍ کاري ورځ روانډا ته د «نا قانونه» کډوالو د استولو کار وځنډاوه.
د کارګر ګوند یوه چارواکي ټېلګراف ورځپاڼې ته دغه خبره تایید کړې ده.
د ټېلګراف ورځپاڼې د جمعې په ورځ (د چنګاښ په ۱۵مه) په نوي حکومت کې د خپلو سرچېنو له قوله لیکلي:« روانډا ته د ناقانونه کډوالو د استولو تګلاره چې د محافظه کارو لهخوا رامنځته شوې وه، اوس په عملي توګه له منځه تللې.»
د کارګر ګوند په خپله ټاکنیزه مبارزه کې ژمنه کړې وه، چې له بریالیتوب وروسته به دغه تګلاره له منځه یوسي.
په همدې حال کې د بریټانیا د کورنیو چارو وزارت بریټانیا ته د «ناقانونه» کډوالو د ورتګ د مخنیوي لپاره د بدیلو لارو د خپلولو خبر ورکړی.
د بریټانیا د کورنیو چارو نوي وزیر اېوټ کوپر (د جمعې په ورځ د چنګاښ په ۱۵مه) وویل، چې د نوي حکومت لومړنی کار د بریټانیا په پولو کې د «امنیت خوندي کول» دي.
هغه وویل، چې د چارواکو سره به په لومړنیو ناستو کې د پولې د امنیت ساتلو لپاره د یوې نوې قوماندانۍ د جوړولو پر سر خبرې اترې وکړي.
د «نا قانونه» کډوالو د اېستلو تګلاره لومړی د پخواني لومړي وزیر بورېس جانسون په حکومت کې جوړه او له هغه وروسته د لیز ټراس او ریشی سونک په حکومتونو کې پر مخ ولاړه.
د دغې تګلارې له مخې تر دې مهاله ۲۷۰ ملیون پونېډه روانډا ته ورکړل شوي، چې په بریټانیا کې د مېشتو «ناقانونه» کډوالو پالنه وکړي؛ خو تر اوسه هېڅ کډوال په جبري توګه هغه هېواد ته نه دی استول شوی.
