د ایران د ولسمشریزو ټاکنو دویم پړاو پیل شو

د ایران د ولسمشریزو ټاکنو دویم پړاو نن سهار د جمعې په ورځ (د چنګاښ په ۱۵مه نېټه) پیل شو. د رای کارولو څو شیبې وروسته د ایران د اسلامي دولت مشر علي خامنه اي خپله رایه وکاروله.

په دغه پړاو کې مسعود پزشکیان او سعید جلیلي یو له بل سره سیالي کوي.
د ټاکنو په لومړي پړاو کې چې تېره جمعه ترسره شو له ۶۰ سلنې زیاتو کسانو له برخې اخیستنې ډډه وکړه، چې د رای ورکولو په شرایطو برابر وو.
د ایران د کورنیو چارو وزارت د رسمي شمېرو له مخې، ۶۱ مېلیون ۴۵۲ زره او ۳۲۱ تنه په کور د ننه او بهر کې د رای ورکولو په شرایطو برابر وو، له هغې ډلې پزشکیان یوازې ۱۰ مېلیونه، ۴۱۵زره او ۹۹۱ رایې او سعید جلیلي د ۹ مېلیونه ۴۷۳ زره او ۲۹۸ رایو په خپلولو سره وتوانېد چې د ټاکنو دویم پړاو ته لار ومومي، چې ګڼ ایرانیان دغو ټاکنو ته د نمایشي ټاکنو نوم هم ورکوي.
د رسمی شمېرو بر بنسټ، په دغه پړاو کې به د رای ورکولو په شرایطو برابر ۶۱ مېلیونه، ۴۵۲ زره او ۳۲۱ تنه په کور د ننه او بهر کې خپلې رایې وکاروي.