د لبنان په سوېل کې د اسراییل په هوايي برید کې د حزب الله یو جګپوړی قوماندان ووژل شو

د لبنان حزب الله وايي، د دوی یو جګپوړی قوماندان محمد نیما ناصر د لبنان په سوېل کې د اسراییل په یوه هوايي برید کې وژل شوی دی. د ایران په ملاتړ دغه ډله وايي، چې د دغه برید په ځواب کې یې د اسراییل پر پوځي پوستو ۱۰۰ توغنذي توغولي دي.

په دغو بریدونو کې د کوم زیان راپور نه دی ورکړل شوی.
د اسراییل پوځ ویلي، چې ناصر د یوې پوځي قطعې مشري په غاړه درلوده چې له سوېلي لبنان څخه پر اسراییل د توغندیو د توغولو دنده یې په غاړه وه.
د اسراییلي پوځ په وینا، ناصر د طالب سمیع عبدالله د پوځي قطعې قومندان و چې تېره میاشت ووژل شو او حزب الله په یوه ورځ کې د غچ اخیستنې په عملیاتو کې د اسرییل پر شمالي سیمو تر ۲۰۰ ډېر توغندي وتوغول.
له دې پېښې وروسته په سیمه کې د جګړې د پراخېدو د مخنیوي لپاره په ځانګړې توګه د ملګرو ملتونو او امریکا له لوري ډیپلوماټیکې هڅې روانې دي.
تر اوسه پورې د لبنان د حزب الله او اسراييلي پوځ ترمنځ په ورځنيو نښتو کې پر لبنان کې تر ۴۰۰ زيات کسان وژل شوي دي چې زياتره يې د حزب الله ډلې غړي دي.
د اسراییل لوري ته هم ۲۵ کسان چې ډېری یې اسراییلي پوځیان دي وژل شوي دي.
همدارنګه په دغو بریدونو کې د پولې دواړو غاړو ته لسګونه زره کورنۍ هم د خپلو کورونو پرېښودو ته اړې شوې دي.