د فرانسې پارلماني ټاکنې د ښي اړخ ګوند د بریا د احتمال تر سیوري لاندې پیل شوې
فرانسویانو د یکشنبې په ورځ د پارلماني ټاکنو د لومړي پړاو لپاره رایه اچونه پیل کړه. دا رایه اچونه په داسې حال کې پیلېږي، چې ټولپوښتنې په دې هېواد کې د دویمې نړۍوالې جګړې راهیسې د لومړي ځل لپاره د ښي اړخ ګوند د بریا احتمال څرګندوي.
د دې ټاکنو دویم او وروستی پړاو به د چنګاښ په ۱۷مه تر سره شي او وروستۍ پایلې به هم له دویم پړاو وروسته اعلان شي.
د فرانسې د پارلمان لومړنۍ ټاکنې د منځلارو ګوندونو د ایتلاف له ناکامۍ وروسته د اروپا د پارلمان په ټاکنو کې د ښي اړخو «ملي اجماع» پر وړاندې تر سره شوې.
د فرانسې ولسمشر ایمانویل مکرون درې اونۍ وړاندي د ښي اړخو ګوندونو د ایتلاف پر وړاندې د خپل منځلاري ګوند له ماتې وروسته د دغه هېواد پارلمان منحل کړ او د پارلماني ټاکنو د ترسره کېدو اعلان یې وکړ.
فرانسوي رایه ورکوونکي د رايو صندوقونو ته ځي، ځکه لومړنیو ټولپوښتنو ښودلې، چې د ښي اړخو ګوندونو «ملي اجماع» به په دې هیواد کې واک په لاس کې واخلي.
د فرانسې ښي اړخو ګوندونو د دویمې نړۍوالې جګړې راهیسې په هېواد کې مطلق واک نه دی ترلاسه کړی.
د فرانسې د ښي اړخ ګوند مشرې مارین لو پین له پارلماني ټاکنو دوه ورځې مخکې رسنیو ته وویل، «موږ به مطلق اکثریت ترلاسه کړو.»
سره له دې چې ایمانویل مکرون د خپلې دورې تر پایه پورې به خپل کار ته دوام ورکړي، خو کارپوهان وايي، چې که ښي اړخه «ملي اجماع» واک ترلاسه کړي د فرانسې ډیپلوماسي به له «بې ساري بدلون» سره مخ شي.
په ورته وخت کې لومړنۍ نظرپوښتنې ښیي، چې د ښي اړخو ګوندونو ملي اجماع به د ۳۳-۳۶ سلنې رایو سره ټاکنې رهبري کړي.
د دې سروې له مخې، د کیڼ اړخو ګوندونو اېتلاف له ۲۸ تر ۳۱ سلنې رایو سره په دویم ځای کې دی او د مکرون منځلاری اېتلاف بیا له ۲۰ تر ۲۳ سلنې رایو سره په دریم ځای کې دی.
