تېرو ۲۴ ساعتونو کې د اسراییل په بریدونو کې ۶۰ فلسطینیان وژل شوي او ۱۴۰ نور ټپیان دي
د غزې د روغتیا وزارت وایي، چې په تېرو ۲۴ ساعتونو کې د اسراییل په بریدونو کې ۶۰ فلسطینیان وژل شوي او ۱۴۰ نور ټپیان شوي دي.
د غزې ملکي دفاعي اداره وايي، چې د غزې په شمالي ښار بیت لاهیا کې د اسراییل له بمبارۍ وروسته د ویجاړۍ کچه « له تصوره لرې او د تمې خلاف ده.»
د الجزیرې د راپور له مخې؛ په ښار کې د ابو عواد په کور له بمبارۍ وروسته لږ تر لږه ۱۵ کسان وژل شوي دي.
دغه کور شاو خوا ۴۰ کسانو ته پناه ورکړې وه. همدا راز عامه زېربناوې او شاو خوا کورونه هم ویجاړ شوي دي.
د متحده ایالاتو د دفاع وزیر لویډ اسټین وایي، چې متحده ایالات د اسراییل او لبنان پر پوله د تاوتریخوالي د پای ته رسولو لپاره «د بېړني ډېپلوماټیک تړون په لټه کې دي.»
پرون ورځ د فلسطیني ډلې وویل، چې د غزې په شمال کې د شاطي کډوالو په کمپ کې د اسراییل په هوايي برید کې د حماس د سیاسي دفتر مشر اسماعیل هنیه د کورنۍ لس غړي وژل شوي دي.
د اکټوبر له اومې راهیسې په غزه کې د اسراییل په جګړه کې لږ تر لږه ۳۷ زره او ۷۱۸ کسان وژل شوي او ۸۶ زره او ۳۷۷ نور ټپیان شوي دي.
د حماس تر مشرۍ پر اسراییل بریدونو کې د وژل شویو شمېر ۱۱۳۹ تنو ته رسېدلی، چې لسګونه کسان یرغمل دي.
