روسي رسنۍ: پوتین د کوریا مشر ته د چای څښلو سیټ، يو خنجر او یو لېموزین په ډالۍ کې ورکړه

روسي رسنیو د چهارشنبې په ورځ راپور ورکړ، چې ولادیمیر پوتین شمالي کوریا ته د خپل سفر پر مهال د دغه هېواد له مشر کیم جونګ اون سره په ليدنه کې هغه ته یو لیموزین موټر، یو د چای څښلو سیټ او يو خنجر په ډالۍ کې ورکړل.

پوتین د سې شنبې په ورځ په تېرو ۲۴ کلونو کې د لومړي ځل لپاره شمالي کوریا ته سفر وکړ.

د روسیې ولسمشر ولادیمیر پوتین نن په شمالي کوریا کې د کوربه هېواد له مشر سره په دفاعي برخه کې تړونونه لاسلیک کړل، چې د مسکو او پیونګ یانګ ترمنځ پوځي همکاري نوره هم زیاتوي.

کیم جونګ اون دا تړون ټولیز ستراتیژیک مشارکت وباله او پر اوکراین یې د روسیې د یرغل ملاتړ هم وکړ.