سویډن او ایران د یو بریالي تړون له مخې د بندیانو تبادله وکړه
سویډن د ایران یو پخوانی چارواکی چې په ۱۹۸۰ کلونو په ډله ییز اعدامونو کې د برخې اخیستو له امله محکوم شوی و، خوشې کړ. بل خوا ایران دوه سویډني بندیان له بنده خلاص کړل. د عمان د بهرنیو چارو وزارت په یوه اعلامیه کې ویلي، چې د بندیانو تبادله د دغه هیواد په منځګړتوب شوې ده.
په اعلامیه کې راغلي: “د عمان د هڅو په پایله کې دواړه خواوو د بندیانو د خوشي کولو په اړه موافقه وکړه، خوشي شوي کسان له تهران او ستاکهولم څخه خپلو هیوادونو ته لیږدول شوي دي.”
د ایران د بشري حقونو لوړپوړي چارواکي پر اېکس ټولنیزې شبکې یو پغیام کې ویلي، چې شویډن په بند محکوم شوی پخوانی ایرانی چارواکی حامد نوري خوشی کړی دی.
نوري په ۱۹۸۸ کال کې په ایران کې د سیاسي بندیانو په ډله ییزه وژنه کې د لاس لرلو په تور محکوم شوی و. ایراني چارواکو ویلي، چې نوموړی به په څو ساعتونو کې ایران ته ورسیږي.
بل خوا د سویډن لومړي وزیر الف کریسترسن په یوه اعلامیه کې ویلي، چې سویډني وګړي جوهان فلوډیروس او سعید عزیزي چې په ایران کې بندیان وو په الوتکه کې سویډن ته پر لاره دي.
کریسترسن وویل: "ایران دوی دواړه د پخواني ایراني چارواکې حامد نوري د خوشي کولو لپاره په بند کې ساتلي وو. نوري په ۱۹۸۰ کلونو کې په ایران کې د جدي جرمونو د ترسره کولو له امله محکوم شوی و.."
هغه زیاته کړه: "د لومړي وزیر په توګه زه د سویډن د وکړو د خوندیتوب لپاره ځانګړی مسؤلیت لرم. له همدې امله حکومت د سویډن امنیتي خدماتو سره یوځای له ایران سره خبرې اترې وکړې او په دې موضوع یې په جدي توګه کار وکړ."
