د بې پولې خبریالانو د ټولنې مشر مړ شو
د نړۍ د بې پولې خبریالانو ټولنه وايي چې د دغې ټولنې مشر «کریسټف ډلور» د ۵۳ کلونو په عمر مړ شو. دغې ټولنې تېره ورځ شنبه د غبرګولي ۱۹مه ویلي چې فرانسوی کریسټف ډلور د سرطان ناروغۍ له امله په فرانسه کې مړ شوی.
دغې ټولنې په ایکس پاڼه لیکلي، چې ښاغلي ډلور ۱۲ کاله د دغې ټولنې مشري وکړه او د خبریالانو د حقونو د دفاع په برخه کې یې نه ستړې کېدونکي هلې ځلې کړې.
د بې پولې خبریالانو د مسوولانو په وینا، «ډلور په هره وچه کې د ازادۍ، خپلواکۍ او د ژورنالیزم د خورېدو نه ستړی کیدونکی فعال و.»
د یادې ټولنې د معلوماتو له مخې چې «کریسټف ډلور» د دغې ټولنې تر مشرۍ مخکې په پاریس کې د خبریالۍ د زدهکړو په مرکز (سي ایف جې) کې دنده لرله.
ویل کېږي چې ښاغلي ډلور له ۱۹۹۸ تر ۲۰۰۷ پورې یو شمېر تلویزیوني چینلونو او د فرانسې له «یو چینل» سره همکار و.
د بې پولې خبريالانو ټولنې په دغې ټولنه کې د «ډلور» د کار کولو ستاينه کړې او د هغه له کورنۍ سره يې خواخوږي او همدردي ښودلې.
