د روسیې او اوکراین د ډرون جګړه: روسیې درې او اوکراین نهه بې پیلوټه الوتکې نسکوره کړي
د روسیې ځايي چارواکي وايي، چې د دغه هیواد په شمالي اوسيتيا سیمه کې یې د اوکراين درې بې پيلوټه الوتکې نسکورې کړې دي. بل خوا د اوکراین د هوايي دفاع او د بې پیلوټه الوتکو د څار ډلو د دغه هېواد په څلورو سیمو کې له ۱۳ روسي بې پیلوټه الوتکو څخه نهه هغه ویشتلې دي.
یوه سیمه ییز مشر سرګي مینیایلو وویل، چې د روسیې هوايي دفاعي ځواکونو د شنبې په ورځ د روسیې د شمالي اوسیتیا – الانیا جمهوریت په موزدوک ښارګوټي کې درې اوکرایني بې پیلوټه الوتکې ویجاړې کړي دي.
د روسیې خبري اژانسونو ویلي، چې دا په دغه سیمه کې د بې پیلوټه الوتکې لومړی برید و.
ښاغلي مینیایلو، د ټیلیګرام په یو پیغام کې لیکلي، چې برید "کوچنی زیان او اورونه" رامنځ ته کړي، او هیچا زیان نه دی لیدلی.
نوموړي ویلي، چې د بې پیلوټه الوتکې موخه دا وه چې پر یوه پوځي هوايي ډګر برید وکړي.
بل خوا د اوکراین هوايي دفاع او د بې پیلوټه الوتکو د څار ډلو د دغه هېواد په څلورو سیمو کې له ۱۳روسي بې پیلوټه الوتکو څخه نهه هغه ویشتلې دي.
د اوکراین د پوځ له خوا په خپره شوې اعلامیه کې راغلي، چې ایراني شهید نومې بې پیلوټه الوتکې د پولتاوا په مرکزي سیمه، سویل ختیځ زاپوریزیا او دنیپروپیتروفسک سیمو او په شمال ختیځ کې د ښارکیف په سیمه کې نسکورې شوې دي.
د روسیې له خوا توغول شوی یو اېکس-۵۹توغندی هم د اوکراینې خواکونو له خوا نسکور شوی دی.
د نیپروپیټروسک سیمه ایز والي سرهي لیسک وویل، چې د بې پیلوټه الوتکې برید سوداګریزې او د استوګنې ودانۍ او همدارنګه د بریښنا مزي زیانمن کړي. په نورو سیمو کې د زیانونو جزیات لا نه دي روښانه شوي.
