هغه ستورمزلی چې د ځمکې د سیارې لومړی انځور یې اخیستی و، د الوتکې غورځېدو په پېښه کې مړ شو

ويليم انډرز د اپولو ۸ پخوانی ستور مزلی، چې په ۱۹۶۸ کال کې يې له فضا څخه د ځمکې د سيارې لومړۍ انځور اخيستی و او د «ځمکې راختلو» په نوم پېژندل شوی و د الوتکې غورځېدو په پېښه کې مړ شو. کارپوهان په دې باور دي، چې انډرز د دې انځور د ځمکې سيارې سره د انسان چلند بدل کړ.

۹۰ کلن ستورمزلی، چې د جمعې په ورځ (د غبرګولي ۱۸مه) یې په یوازې توګه الوتنه کوله هغه مهال مړ شو، چې الوتکه یې د واشنګټن ایالت د سن خوان ټاپوګانو په اوبو کې ولوېده.

د ناسا مدير او پخواني سناتور بيل نلسون وویل؛ انډرز د اکتشاف او کشف رښتنې څهره وه، هغه زياته کړه: « انډرز د سپورمۍ څنډ ته سفر وکړ او له موږ سره یې مرسته وکړه، چې نوي څه وګورو.»

په ۱۹۶۸ کال کې د اپولو ۸ ماموریت لومړنی انساني فضایي الوتنه وه، چې د ځمکې له ټیټ مدار څخه ووتله، سپوږمۍ ته لاړه او بیرته راستانه شوه.

انډرز د دې فضايي سفر په ترڅ کې د ځمکې څخه خپل مشهور عکس اخیستی، چې د فضا کارپوهان يې د ځمکې په اړه د بېلابيل پوهاوي لومړنۍ څرک ګڼي.

د ناسا یو متقاعد ستور مزلي مارک کلي د ښاعلي انډرز د مړينې په اړه وویل، چې هغه «د ځمکې او د خپل ځان په اړه زموږ نظر د تل لپاره بدل کړ.»

ویلیم انډرز په ۱۹۳۳ کال کې په هانک کانک کې زیږیدلی او په ۱۹۶۳ کې د ناسا سره کار پیل کړی و.