فرانسه اوکراين ته نوې جنګي الوتکې ور کوي
د فرانسې ولسمشر پرون وویل، چې د پوځي همکارۍ د نوي تړون پر بنسټ به اوکراین ته مېراژـ۲۰۰ جنګي الوتکې واستوي. د دغه تړون له مخې به فرانسه د روزنیزو کورسونو لپاره اوکرایني پیلوټان او د اورګاډي چلوونکي روزي.
ایمانویل مکرون وویل چې په فرانسه کې به ۴۵۰۰ اوکرایني سرتیري هم روزل او د خپل هیواد د دفاع لپاره به سمبال شي.
د فرانسې ولسمشر دا ونه ویل چې اوکراین ته به څومره جنګي الوتکې ورکړي، خو دا یې ومنله چې د اوکرایین پیلوټانو لپاره د روزنې کورسونه به له پنځو تر شپږو میاشتو پورې دوام وکړي، چې د دوبي په پای کې پیلیږي.
دغه ژمنې فرانسې ته د اوکراین د ولسمشر ولادیمیر زیلینسکي په سفر کې شوې دي.
له بلې خوا مکرون ویلي، د اوکراین ولسمشر او د دفاع وزیر خپلو ټولو لویدیځو متحدینو ته په یوه رسمي لیک کې د اوکراین په خاوره کې د دغه هېواد د ځواکونو د سملاسي روزنې غوښتنه کړې ده.
په همدې حال کې، داسې ګنګوسې وې چې په فرانسه کې له ولادیمیر زیلینسکي سره له لیدنې وروسته به ایمانویل مکرون ډیر ژر اوکراین ته د فرانسوي روزونکو لیږل اعلان کړي، خو تر اوسه یې په دې اړه څه نه دي ویلي.
له بلې خوا ولسمشر مکرون ټینګار وکړ، چې له اوکراین سره د همکارۍ په اړه د فرانسې پرېکړې د دغه هېواد له متحدینو سره په مشوره شوې دي.
په دې وروستیو ورځو کې یوشمېر لویدیځو هېوادونو اوکراین ته اجازه ورکړې، چې په خپلو مرستندویه وسلو سره د روسیې په خاوره کې پر هدفونو بریدونه وکړي.
له دې پرېکړې وروسته ولادیمیر پوتین لوېدیځو هېوادونو ته خبرداری ورکړ او ویې ویل چې دا کار له "اور سره لوبې" دی.
