د ایران د پارلمان مشر: د بهرنیو وګړو موضوع له پامه غورځول امنیتي پایلې لري
د ایران پارلمان مشر او د دغه هیواد د ولسمشرۍ ټاکنو ته احتمالي نوماند وویل چې هغه د «ناقانونه بهرنیانو د څو اړخیزو ستونزو» د هواری په لټه کې دی. محمد باقر قالیباف خبرداری ورکړ چې دغو ستونزو ته نه پاملرنه به «امنیتي، اقتصادي او ټولنیزې پایلې» ولري.
د چهارشنبې په ورځ ښاغلي قالیباف په خپله ایکس پاڼه لیکلي: «موږ له دې موضوع پوره خبر یو او په راتلونکي حکومت کې به د خلکو اندېښنې حل کړو.»
هغه زیاته کړه: «په دې برخه کې بې کفایتي امنیتي، اقتصادي او ټولنیزې ستونزې زیاتوي.»
د ایران حکومت چارواکي ډیری مهال په ایران کې افغان کډوال د «ناقانونه» بهرنیانو په توګه یادوي. په وروستیو میاشتو کې په ایران کې د افغان کډوالو پر وړاندې د ایراني حکومت د ځینو چارواکو دریځ سخت شوی دی.
د غبرګولي میاشتې په پنځمه د تهران مرستیال او د ری ښار والي مهدي باب الحوایجي په یوه رسمي غونډه کې وویل چې «له ناقانونه وګړو سره مبارزه، لکه د جګړې په ډګر کې داسې ده.»
دغه چارواکي خپلو همکارانو ته وویل: «تاسو باید ډګر ته راشئ، دا کار جهادي کار دی.»
د تهران د والي مرستیال په ایران کې د افغان کډوالو شتون ته په اشارې سره وویل: «زموږ د کورونه شاوخوا ته اخلاقي، ټولنیز او اقتصادي ماینونه اېښودل شوي.»
هغه ایراني کارګمارونکو ته خبرداری ورکړ چې که دوی «ناقانونه وګړو» ته دندې ورکړې نو محاکمه او مجازات به شي.
