محمود احمدي نژاد د ایران په ولسمشریزو ټاکنو کې نوم لیکنه وکړه
د ایران پخواني ولسمشر محمود احمدي نژاد د دغه هېواد په راتلونکو ولسمشریزو ټاکنو کې نوم لیکنه وکړه. ښاغلي احمدي نژاد د یکشنبې په سهار د ایران کورنیو چارو په وزارت کې د ټاکنو په مرکزي دفتر کې له نوم لیکنې وروسته وویل چې «دا یوه نوې او ویاړلې دوره کېدای شي.»
احمدي نژاد وویل؛ چې «د اکثریت خلکو اقتصادي وضعیت ته په کتو هر مسوول کس له صبر او زغم څخه بې برخې کوي.»
د ایران دغه پخواني ولسمشر له خپلو یو شمېر پلویانو سره د کورنیو چارو وزارت د ټاکنو په مرکزي دفتر کې نوم لیکنه وکړه.
احمدي نژاد له ۱۳۸۴څخه تر ۱۳۹۲ پورې د ایران ولسمشر و.
نوموړی په ۱۴۰۰ کال کې د ایران په ولسمشریزو ټاکنو کې له ګډون څخه بې برخې شوی و.
د ایران د ولسمشریزو ټاکنو د نوماندانو د نوم لیکنې بهیر د یکشنبې په ورځ په څلورمه ورځ هم دوام درلود او ټاکل شوې سبا هم نوماندان نوم لیکنه وکړي.
د ایران د مخکني ولسمشر ابراهیم رییسي د مړینې له امله د ایران ولسمشریزې ټاکنې ټاکل شوې له وخت وړاندې د روان کال د چنګاښ په اتمه ترسره شي.
