په نیویارک کې د فلسطین ملاتړو معترضو د بروکلېن موزیم ځینې برخې نیولې دي

په نیویارک کې د فلسطین ملاتړو معترضو د جمعې په ورځ د بروکلېن موزیم ځینې برخې نیولې دي. له دغې پېښې وروسته د دغه موزیم چارواکو ویلي، چې د ګډوډۍ او د پولیسو سره د معترضو د نښتو له امله یې خپل کارکوونکي یو ساعت مخکې رخصت کړي دي.

ویل شوي، چې ډېری معترضین نیول شوي هم دي.
معترضانو د دغه موزیم په دروازه یو بنر ځړولی او د موزیم دباندې یوه مجسمه یې په سپرې رنګ کړې ده.
لاتراوسه د نیول شویو معترضو شمېر روښانه نه دی.
ویل شوي، چې له دغې نښتې وروسته د موزیم دباندې د څو ساعتونو لپاره لاریونونه روان وو.
د شاهدانو په وینا، په بروکلېن کې په سلګونه معترض کسان د لاریون پرمهال ولاړ وو چې یوناڅاپه د موزیم ودانۍ ته دننه شول.