د اسراییل پوځ وايي، د غزې په شمال کې یې جګړه ییز عملیات بشپړ کړي دي
اسراییلي ځواکونو له څو ورځنیو سختو جګړو وروسته د غزي په شمال کې په جبالیا سیمه کې خپل عملیات پای ته ورسول. په دغو عملیاتو کې، اسراییلو په جبالیا سمه شاوخوا ۲۰۰ هوایي بریدونه کړي دي.
د اسراییل پوځ د جمعې په ورځ ویلي، چې د رفح په مرکز کې یې د حماس له تونلونو راکټونه او د نورو وسولو زیرمې موندلي دي.
په جبالیا کې له دوو اونیو سختې جګړې وروسته د اسراییل پوځ په یوه اعلامیه کې ویلي، چې پوځیانو یې خپل عملیات بشپړ کړي او په غزه کې د نورو عملیاتو لپاره د چمتووالي په حال کې دي.
د دغو عملیاتو په ترڅ کې اسراییلي پوځیانو په غزه کې د ۲۵۰ یرغمل شویو کسانو له ډلې د اوو تنو جسدونه هم ترلاسه کړي دي.
د غزې روغتیا وزارت د جمعې په ورځ په یوه تازه راپور کې وویل، چې په غزه کې د اسراییل په هوایي او ځمکني بریدونو کې ۳۶ زره او ۲۸۴ فلسطینیان وژل شوي او ګڼې سیمې په کنډوالو بدلې شوې دي.
د اسراییل یو جګپوړي امنیتي چارواکي د جمعې په ورځ وویل، چې اسراییل به د جګړې د درولو لپاره هېڅ یوې موافقې ته حاضر نه شي مګر دا چې د یرغمل شویو ژوندې ستنیدل یې برخه وي. خو حماس د پنجشنبې په ورځ ویلي و، چې دوی به هغې موافقې ته چې پکې د فلسطیني زندانیانو تبادله شامله وي چمتو شي.
دوه ورځې مخکې، د اسراییل د ملي امنیت سلاکار ویلي و، چې د غزې جګړه به لږ تر لږه اووه میاشتې نور هم دوام وکړي.
