د رییسي د چورلکې غورځېدو دویم راپور: د ورانکارۍ له امله رامنځته شوې چاودنه رد شوې
د ایران د وسلهوالو ځواکونو لوی درستیز چې د ایران د مخکني ولسمشر ابراهیم رییسي د سپرلۍ چورلکې د غورځېدو په اړه د څېړنو مسوولیت په غاړه لري په تازه راپور کې ويلي، «د ورانکارۍ له امله د چاودنې رامنځته کېدل او د الوتنې پرمهال د غرونو له لوړو څوکو سره لګېدل» رد کړل.
دغې ادارې په خپل وروستي راپور کې ویلي، چې د الوتنې پر مهال د ورانکارۍ له امله رامنځ ته شوې چاودنه او د غره له لوړو څوکو سره ټکر د څېړنو له احتمالي پړاو څخه لرې شول.
د دغې ادارې دا دویم راپور دی، چې وایي «د مخابراتو سیسټم کې د ګډوډۍ یا په فریکونسۍ کې مداخلې» هم رد شوې دي.
د وسلهوالو ځواکونو د لوی درستیز دویم راپور چې د چهارشنبې په ورځ د ۱۴۰۳ کال د غبرګولي میاشتې په نهمه نېټه خپور شو، راغلي چې په ترسره شویو څېړنو کې «د چورلکې وړتیا ته په کتو د پېښې په رامنځته کېدو کې اغېزمنې کومې نیمګړتیاوې نه دي لیدل شوي.»
په دغه راپور کې ویل شوي، چې (۳۰-۲-۱۴۰۳) د هوا پېژندنې د «راپور په اساس د الوتنې تر لومړۍ او دویم مقصده (د اغبند پله او د قیز قلعه سی دیوال) پورې د هوا حالات تر ۹:۵۰ دقیقو د (VFR) له مخې الوتنې ته مناسب و؛ خو دا چې د بېرته راګرځېدو په وخت د هوا حالات څومره مناسب و، د دوو نورو الوتکو د سورلۍ او پیلوټانو څخه نظر اخیستلو او نورو څېړنو ته اړتیا لري، چې د وروستیو اسنادو له لاس ته راوړلو وروسته به خپاره شي.»
په دغه راپور کې د ایران د وسلهوالو ځواکونو د لوی درستیز د مسلکي کارپوهانو په حواله لیکل شوي، چې په «نسکوره شوې چورلکه کې د برېښنايي جګړې د هڅو اغېزې نه دي لیدل شوې.»
د وسلهوالو ځواکونو د لوی درستیز لومړی راپور د پنجشنبې په ورځ د ۱۴۰۳ کال د غبرګولي په درېیمه نیټه خپور شو، په راپور کې راغلي چې «د رییسي د سورلۍ چورلکې په بدن کې د ډزو هیڅ نښې نه دي موندل شوي» او چورلکه د غرونو له لوړو څوکو سره د ټکر» له امله غورځېدلې.
د ایران دیارلسمې دورې د حکومت مشر او د هغه د حکومت د بهرنیو چارو وزیر له څو تنو نورو سپرلیو سره په یوه چورلکه د غبرګولي درېیمه نیټه د ختیځ اذربایجان ولایت د دیزمار په ځنګله کې نسکوره شوه او په کې ټول سپاره کسان ووژل شول.
