رفح ته څېرمه د مصري پوله ساتو او اسرايیلي ځواکونو تر منځ يو پر بل بريدونه کړي
اسراییلي رسنیو ویلي، چې مصري پوله ساتو او اسراییلي ځواکونو رفح ښار ته څېرمه پر یو بل ډزې کړې دي.
جروزالم پوسټ په یوه راپور کې لیکلي، چې په دې پېښه کې لږ تر لږه یو مصري سرحدي ساتونکی وژل شوی دی.
په دې پيښه کې اسراييلي پوځيانو ته زيان نه دى اوښتى.
دغې رسنۍ د اسرايیلي پوځ د سرچینو له قوله لیکلي، چې د مصر سرحدي ساتونکو پر اسراییلي ځواکونو ډزې وکړې، چې وروسته اسراییلي پوځیانو ځوابي ډزې وکړې.
له دې پېښې وروسته د اسراییلي پوځ چارواکو له مصري چارواکو سره اړیکه ونیوله، چې د ډزو مخه ونیسي.
د اسراییل پوځ رسنیو ته ویلي، چې د دې پېښې په اړه به له مصري چارواکو سره خبرې او څېړنې وکړي.
