سوېلي اسیا کې ګرمه څپه؛ په هند کې د تودوخې نوې څپې لږ تر لږه نهه کسان مړه کړي دي
د سوېلي اسیا ځینې برخې د ګرمۍ له سختې څپې سره مخ دي؛ په لویدیځ هند کې د تودوخې څپې له امله لږ تر لږه نهه کسان مړه شوي دي. له بل پلوه په بنګله دېش او د لوېدیځ بنګال په ځینو برخو کې د سخت توپان ګواښ شوی دی.
د رویټرز خبري اژانس د راپور له مخې، نړۍوالو ساینس پوهانو ویلي چې په ټوله اسیا کې د تودوخې په کچه کې زیاتوالی راغلی چې دا د اقلیمي بدلون د پایلو نښه ده.
د اوړي د تودوخې درجه د مې په میاشت کې لوړیږي؛ خو ساینس پوهانو سږکال د نورمالې تودوخې څپې وړاندوینه کړې ده.
د سیمهییزو رسنیو په وینا، د هند په راجستان ایالت کې د سختې ګرمۍ له امله لږ تر لږه ۹ تنه مړه شوي دي.
د راپورونو له مخې، د راجستان په بارمیر کې د پنجشنبې په ورځ د تودوخې درجه ۴۸.۸ درجې ښودل شوې وه.
د هواپوهنې چارواکو د دغه ایالت په ډېرو برخو او همدارنګه په شمالي ایالتونو پنجاب او هریانه کې هم د تودوخې د نوې څپې خبرداری ورکړی دی.
د پاکستان د اقلیم د بدلون وزارت ویلي، د پنجشنبې تر ورځې (د مې ۲۳مه) پورې ۲۶ ولسوالۍ د ګرمۍ تر سختې څپې لاندې وې او شونې ده چې د مې تر ۳۰مې به دغه حالت دوام وکړي.
داسې اټکلونه هم شته، چې په راتلونکو ورځو کې به د سند په دوو ښارونو کې د تودوخې درجه ۵۰ درجو ته لوړه شي.
