روسیې مسکو ته څېرمه د کنسرت په تالار کې د خونړي برید په تړاو لږ تر لږه ۲۰ کسان نیولي دي
د روسیې د امنیتي خدماتو مشر وايي، تر اوسه یې په مسکو کې د کروکس په تالار کې د خونړي برید په تړاو تر ۲۰ زیات کسان نیولي دي. الکساندر بورتنیکوف زیاته کړه، چې د قزاقستان، قرغزستان، تاجکستان او ازبکستان استخباراتي ادارې له روسیې سره په تحقیقاتو کې مرسته کوي.
د روان کال د مارچ په ۲۲مه د مسکو په څنډه کې د کروکس په تالار کې خونړی برید وشو.
په دغه برید کې تر ۱۴۰ ډېر کسان ووژل شول، چې پړه یې داعش منلې ده.
د روسیې دولتي خبري اژانس تاس ویلي، الکساندر بورتنیکوف اوکراین په دې برید کې په لاس لرلو تورن کړی دی.
ښاغلي بورتنیکوف وویل: "څیړنې روانې دي، خو موږ ویلای شو چې اوکراین په مستقیم ډول په دې برید کې لاس لري."
روسیې تر دې مخکې ویلي و، څلور هغه کسان چې تالار ته ننوتي او پر خلکو یې ډزې کړې وې، دوی نیولي دي.
روسیې دا ټول د تاجکستان وګړي اعلان کړل او ویې ویل چې د دوی نور ملګري چې د تاجکستان دي، پېژندل شوي او نیول شوي دي.
