د روسیې د پوځ د لوی درستیز مرستیال د مالي فساد په تور ونیول شو

د روسیې یوې پوځي محکمې د پنجشنبې په ورځ د دغه هېواد د پوځ د لوی درستیز مرستیال وادیم شامارین د نیولو امر صادر کړ. نوموړی د یوې قضیې په تړاو په فساد تورن دی.

که چیرې دا تور ثابت شي، د روسیې دغه نظامي چارواکی به په ۱۵ کلونو بند محکوم شي.

د روسیې تاس خبري اژانس د پنجشنبې په ورځ راپور ورکړ، چې دغه جګپوړی پوځي چارواکی د سترو بډو د اخېستلو په تور تورن شوی دی.

د روسیې د یوې پوځي محکمې ویاند وویل، چې وادیم شامارین د روسیې د جزا د قانون د ۲۹۰ مادې د شپږمې فقرې له مخې په "لویه کچه د بډې په اخېستلو" تورن دی.

د محکمې پرېکړه لا نه ده نافذه شوې او د استیناف وړ ده. د روسیې د جزا قانون د بډې اخېستلو لپاره تر ۱۵ کلونو پورې د بند سزا ټاکلې ده.

تر دې مخکې د روسیې د دفاع وزیر مرستیال تیمور ایوانوف او د دغه هېواد د دفاع وزارت د اطلاعاتو د ساتنې د څانګې پخوانی مشر یوري کوزنتسوف د پراخ مالي فساد په تور نیول شوي وو.

د راپورونو له مخې د دغه جګپوړي روسي پوځي قوماندان د نيولو امر د هغه د کور له پلټنې او څیړنو وروسته صادر شوی.